「分類實用台語錦囊」電子冊構想

「分類實用台語錦囊」電子冊个構想：

一、以實用做出發點，分類整理、舉例解說台語个語詞、表達法。像我最近寫个「佮『抱』有關个台語單字動詞」、「用肩胛頭負擔物件个台語單字動詞」。有單字、多字詞、慣用語、規句話。

二、有台語文通[thang]看，嘛有聲音通聽。

三、卡焦燥[ta-sò]个解說舉例了後，愛佮[kah]一寡趣味个物件。親像短片，一對愛人仔，透過怹「蜜絞糖」个心適對話，予儂學著正確、精密个台語。

例：
阿嬌：「A-ná-tah，儂欲抱抱[phō-phō]！」
阿明：「汝是按怎？跤袂行？汝遮爾古錐膨皮，我抱汝袂贏。無，共汝偝[āinn]好啦。」
阿嬌：「哪有啦？我跤好好啦！儂欲惜惜啦！」
阿明：「Hònn! 汝是愛儂攬喔？」
阿嬌：「Hènn啦！欲 lán 啦。」
阿明：「Cut! 喙唇愛合起來，來，ㄌ、am、lám，閣講一遍！」
阿嬌：「嗯[mh]，儂欲攬攬！」
阿明：「Hóo! 汝一句講 to袂曉話。汝著愛勇勇，毋通荏荏[lám-lám]。」
阿嬌：「哼[hng]！查埔儂龜龜毛毛，無愛佮汝好矣，以後汝著去攬石頭、睏路邊。」
阿明：「喔，惜惜！惜惜！佮汝滾笑一下爾啦，來來，共汝攬一下honnh！」

（愛有變化，袂使逐擺攏查某个卡頇顢，按呢會造成語言能力佮性別相關性个刻板印象，加強䆀个意識型態）

四、用 epub 格式發行，方便儂佇手機仔、平板電腦佮 PC 攏會用得觀看使用。若有市場，才出豪華版 APP。

五、有興趣个友志，敬請賜教、歡迎合作，予咱个台語文出頭天。