本文
傳統个台語字典佮漢文先生，只有八音本調个智識，後來个傳教士佮語言學家才「發現」閣有「變調」（或者是叫做「連讀調」、「轉調」）个存在。
變調个規則，佇台語口語相當嚴格，可比講「及物動詞+受詞」，動詞一定愛變調。這已經變做一種「常識」，也是台語演講、朗讀比賽个時，裁判定定會「掠包」个重點。
總是，台語个奧妙，毋是到即个坎站，著攏已經予咱發掘了了矣。台語聲調个變化，太複雜，勿[mài]講特殊變調（親像輕聲），著準是一般个變調，啥乜時陣愛變、免變，其實就整體个台語語料來講，實在毋是咱一般所想个遐爾單純。
所謂「整體个台語語料」，是包括文言文佮「半書面語」（包括四句連等等个「非日常口語形式」），馬上舉一例，佇賣藥仔个廣告詞定定聽見：
拳打南山猛虎 [Kûn# tánn# lâm-san# bíng-hóo#]
跤踢北海蛟龍 [Kha# that# pak-hái# kau-liông#]
音標有出現 # 號个，前音節唸本調，其他攏唸變調。
咱佇遮，現拄現看會出，伊个及物動詞並無變調，是唸本調。閣有，伊四字名詞「南山猛虎」「北海蛟龍」嘛佇中央第二字著「切斷」來唸本調，比較「日本婆仔」「中國新娘」，前三字攏愛變調。
伊个「拳、跤、踢、北」攏講白話音、白話詞，但是伊規句个句讀[kù-tāu]是一種「文言文」。傳統漢文先生咧唸古文，著是用即種「卡愛保持本調个變調法」。
提示：台語唸文言文个變調法，佮日常口語變調法，有出入，影響著白話中若出現「書面語詞」，嘛往往保持本調，無照口語變調法去變。請各位加聽一寡傳統布袋戲、歌仔戲个口白，對即个方向去體會。
像教育部台語朗讀稿內底个文章，其實有出現袂少書面語詞，若照我个主張，著準是及物動詞，唸本調顛倒卡「自然」。但是我知影即馬个台語裁判，真有可能會講按呢毋著，所以我只好攏教學生，照普通个口語變調去唸。
面冊網誌留言
Lin Yang
1.既然及物動詞愛變調，寫台羅的時陣，是安怎受詞頭前毋寫“－”？
Lin Yang
2.我看台灣電視有真濟儂及物動詞本該變調無變調，遮敢是台語退化？
Lin Yang
3.是不是變調，南山猛虎－－－愛看頭前的詞kah後壁的詞是毋是有強烈的修飾關係，遮各儂的理解無siang5，一寡有爭議的詞，會當靈活處理
杜建坊
潘兄个「及物動詞+受詞」，動詞一定愛變調？我看只條真有通討論！
我个淺見，決定个因素照理是「語義焦點」。
口語先mai3講，就以「通俗漢文」為例，變調、無變調、兩可，三種攏有：
拳打南山猛虎 [Kûn# tánn# lâm-san# bíng-hóo#]─(無變調)
我少年時个讀法：
蜈蚣#百足，行#不及蛇；斑鳩#兩翼，飛#不及鴉。─(無變調)
朝遊僧寺，「暮#宿破窯」─(變調)
俊秀才郎，反配#粗陋之婦=反配粗陋之婦(變調&無變調)
潘科元
感謝建坊兄提供豐富个語例。汝我所講，平平攏是咧反駁「及物動詞一定愛變調」即條通俗个「常識」。
不過，咱通進一步探討，「朝#遊#僧寺#，暮#宿破窯#」即兩句，雖然有對仗，但是「遊、宿」兩个動詞單字个變調行為，前後無仝。這毋是干焦牽涉「語義焦點」，閣有句法結構、音步韻律、個別聲調个特性，種種複雜个因素。
潘科元
Lim Yang先生，教羅/台羅个連字號(hyphen)毋是用來指示變調个路用，是欲連接一个詞(word)內底个音節。
若是日常口語及物動詞佇生活對話內底，後壁若接名詞受詞（代名詞受詞卡複雜，且無論），正常攏愛變調。
電視台語劇个少年演員，台語程度多數攏足差，怹家治平素時已經攏無咧講台語矣。
杜建坊
講了著。只句愛修正：「語義焦點」是決定个要素，kun-tu句法結構、音步韻律、個別聲調个特性，種種複雜个因素，亦愛考慮。
「朝#遊#僧寺#，暮#宿破窯#」兩个動詞單字个變調行為，前後無仝。
只對無仝个變調行為真歹解說，可能是一種「聲調修辭法」，利用無仝个聲調變化，求一種韻律个美感。
咱用只對來對照：「朝#為#田舍郎# 暮登#天子堂#」，亦是仝款模式。
杜仲奇
後生感覺潘老師講了真thiat，真有發現，確實真濟漢文「及物動詞+受詞」無變調，如「雲想#衣裳花想#容」，m-ku「朝#遊#僧寺#，暮#宿破窯#」條件仝款，變調無仝，真歹解說，也無法度用「語義焦點」決定，用「聲調修辭法」雖講可能會通，但khah像文學个平仄修辭觀點……
Ping Hua Si
我較早教歷代文選，每教了一篇唐朝的文章，就教學生用台語朗讀。除了遵守(語法)變調的規則以外，嘛愛注意「詩有詩眼，句有句眼」(「語義焦點」？)……。總講一句，毋管白話、文言，按怎變，就是愛予人聽有、閣掠著重點。初初卜讀好一篇文章，是真無簡單。加讀幾篇，就愈來愈紲(sua3)喙矣──「熟能生巧 。
Comments powered by Disqus.