台語白話字（教會羅馬字）个文獻我也看過袂少，也辦讀冊會，鼓舞逐家來讀，我也有咧寫全羅个台文，蓋清楚拼音台文个相對好處，佮漢字台文个嚴重缺點。
但是我佇西洋傳教士、台灣先賢、日本儂台語學者佮教育者所留落來个台語記錄、台文著作內底，看著怹對漢字个態度，並無像現時台文界一寡先進遐爾強烈个反感、反對。
儂講台語文著愛全部寫漢字才是好，我也無認同；儂講廢漢字、全用拼音字來寫台語才是好，我也無認同。
連發明白話字，閣鼓吹咱來使用白話字个傳教士本身，嘛毋是即種極頭个態度佮做法。怹對西洋過福建、來台灣，短短幾十年，毋但設立教會、傳播福音，而且精通閩、台語音韻，制定拼音系統，閣培養出真深个漢文素養，甚至編集閩台語辭典、台音漢字字典佮經典古文个白話字註解，予咱到今閣thang學習、受益。
我欽服當年台語文前輩即種深遠个眼光、闊大个心量。也相信像怹按呢包容多元，才會予台語文佇當今社會有機會閣興旺起來。
以下補充：
毋通趕緊欲定於一尊。阮毋是全然無原則，烏白寫；但是也毋是「汝死我活」，只容允採用一套文字形式。
因為台語非常豐富多元，為著充份表達即種語言，咱著愛同齊掌握羅馬拼音佮台語常用漢字即兩種書寫形式。
請考慮一點：咱用過偌濟時間去學習華語文、咱又閣用過偌濟時間去學習台語文？根本是天差佇地，咁毋是？
咱若自細漢，有用學華文 1/3 个時間來學母語台文，欲同齊學會曉台語羅馬字佮台語常用漢字，根本簡簡單單。
學起來了後，欲按怎組合應用即兩種文字形式，就看場合、用途、個人个意愛來配搭。
像我佇 Facebook 面對多數無學過台語文个朋友，就是寫漢字為主个台文；但是我將古文翻做台文，有用全羅个台文。
羅馬字也會用得當做「音標」，也會用得當做「文字」。像中國迄爿，嘛是攏有學「漢語拼音」佮「漢字」兩種書寫形式，怹是以漢字為主，但是招牌、路牌也看會著漢語拼音。
日本嘛是仝款，有漢字、「假名」，假名閣分平假名、片假名，而且日本儂嘛自細漢就會曉日語个羅馬拼音寫法。按呢看起來，怹咁無比咱較濟(多)套？並無特別困擾。囡仔咧寫日文，就用較濟「假名」，大儂咧寫，就用較濟漢字，有个較深个漢字，就附帶「假名」注音。寫台語文，嘛會使參考即種做法。
漳泉口音差別，照家己个母語按怎講，就按怎寫。寫會順了後，才去揣(找)儂整理个漳泉音主要个差別點來參考。
即方面，漢字較抽象，會用得涵蓋無仝腔口，像「皮鞋」攏寫「皮鞋」，但是台南腔是講「phuê-ê」、台北腔是講「phê-uê」，有看過漳泉方言差个資料，閣時常看羅馬字台文，抑是定定佮外地儂交流，就反應會過來。因為講話、文章，攏有語境、上下文，所以無像表面看起來遐爾(那麼)困難。
較抽象个漢字，有伊个好處，方便望文生義；較具體个拼音，也有伊个好處，方便記錄語氣詞、合音詞、外來語、閣取代一寡歹寫歹記个漢字，閣表現腔口特色，予儂感受著一種漢字傳達袂出个親切感。
當然，前提是羅馬拼音著愛有夠熟，但是欲熟羅馬拼音，絕對比欲熟漢字加足緊。咱只是使用漢字幾十年，才對羅馬拼音有排斥感。若是囡仔來學，所有个實驗佮實際經驗，攏證明學羅馬字比學漢字，較緊會曉讀寫台語。
若對長期學習、使用中文漢字，已經足慣勢个大儂來講，有歲了後才欲學台語羅馬字，著愛特別認真，若無，無法度突破一開始个心理障礙。
華語有 ㄇㄚ ㄇㄚˊ ㄇㄚˇ ㄇㄚˋ 四聲，咱咁毋是自細漢六、七歲就攏足清楚，是按怎咱讀到中學、大學畢業，到今七老八老，猶原毋知台語有幾聲？因為國民黨無愛予咱了解咱家己个語言、文化、佮歷史啦！
所以咱大儂欲學台語文，至少愛透過羅馬字音音標个學習，將台語基本个聲韻系統學起來。欲看全部羅馬个台文，一時有困難，至少著愛看有以漢字為主个台語文，佮其中个一寡仔羅馬字音標。
Comments powered by Disqus.