台語文「不倫不類」？

有一个故事：父囝兩儂，牽一隻驢仔佇路裡，迄隻驢仔無論是予老父一儂騎，抑是予囝騎，抑是兩儂做伙騎，抑是兩儂攏無騎，攏有過路儂批評、恥笑怹。聽講路尾是父囝做伙夯迄隻驢仔來行。

台語欲寫做文字嘛按呢。寫羅馬字嘛有台灣文學大師嫌講「不倫不類」。頂兩日仔閣看著一位鄉親佇 Facebook 咧講目前阮寫即種台語漢字，攏是借用个，「不倫不類」。當然，閣卡免講寫漢羅合用个台語文，彼[he]反對个聲頭會予汝臭耳聾[lâng]。

遮个儂攏講怹台語真老[láu]，但是怹連台語有幾種聲調嘛毋知，家己毋知見笑，閣攏講北京語、寫北京文咧嫌肝嫌腱，看衰台語文。

怹根本毋知，漢文自古以來就是「不倫不類」个文字。親像「且」是象形字，畫一支「陽物」，佮 "and" 無關係；「也」也是象形字，畫一个「女陰」，佮 "also" 無關係；「蛋」是中國南方一个「非漢族」个族名，佮 "egg" 無關係，（漢字咧號非漢族，像「閩、蛋」攏有「虫」佇內底）。但是無論文言文、抑是北京話文，攏嘛予怹感覺蓋高尚。獨獨台語文，按怎寫攏會予怹罵。

台灣語文、台灣文化、甚至規个台灣个前途，就予即款高尚人物活活翕[hip]--死。