有先進無接受目前教育部將台語 thóo（第二聲高降調）佮 thôo（第五聲低升調）分寫做「土」「塗」兩字，認為無必要，增加困擾，只要看上下文來判斷就可以，像「土地」是唸 thóo-tē，「土豆」是唸 thôo-tāu（華語〔花生〕，但是佇中國東北〔土豆〕是馬鈴薯）。
台語欲寫漢字真歹剃頭，因為語音分化了真幼，漢字分化个速度綴袂著（跟不上），thóo、thôo 雖然會使準做文白異讀，但是實用上，是毋是真正攏無問題？
即个問題是按呢啦……（學某市長候選人个話母）：
一个例：「土地 thóo-tē」是 "land" 个概念，「塗地 thôo-tē」是塗質个地，相對於沙地、石仔地、紅毛塗地等等；或者是指無儂工鋪面个地。
閣一个例：「某儂 塗~塗塗」、「某儂 土~土土」意思完全無仝，前者是處境真慘，後者是個性土直[thóo-ti̍t]、土公[thóo-kong]。
古早台灣儂用字，有真濟是無分 thóo 佮 thôo，所以地名「土城」愛唸 thôo-siânn、「土庫」愛唸 thôo-khòo，但是有儂有設法來分別，像儂名，台語老演員「金塗」本名就是「張金塗」，伊毋是寫「金土」，因為是唸 Kim-thôo，毋是 Kim-thóo，閣有个儂个做法是佇「土」字右下角加一點，袂輸是將「玉」字擦消頂面第一橫按呢，即兩種做法，攏是欲提醒儂伊个名是 thôo 个音，毋通共伊叫做 thóo。
對以上，咱thang知，佇某一寡應用个場合，台灣儂前輩早就發現 thôo、thóo 分寫个好--處。若是像「土豆」、「塗豆」即款，寫「土豆」當然是較輕鬆，也袂唸毋著，總--是，愛整體性來考慮用字，綜合判斷優缺點。均屬都是一好佮一gâi，無兩好相排。這佮「jîn、lâng」是毋是愛分寫做「人、儂」也是差不多仝款情形。總--是，教育部「土、塗」有分寫，「人、儂」從俗，無分寫，攏用「人」--字爾爾。
（2014-11-27 先發表佇 Facebook）
Comments powered by Disqus.