台語有講「嗎」嗎？

阮細漢塊講台語，並無用著句尾疑問詞「嗎」。高中、大學个時，去台南揣儂tshit-thô，聽著佮我頂下歲个台南少年儂，不時講著「嗎」。即種講法，現今愈來愈儕，無論是台北縣、宜蘭、屏東來个少年儂，攏真愛按呢講。

真儕台語界个序大，不止反對即種講法，認為彼是予北仔話穢[uè]--著个，台語根本無這種話，嘛無需要這種話。

總是，日本時代留落下个文獻，包括日本儂做个、台灣儂做个台日對照个台語教材，抑是教羅个台語文，攏有出現疑問詞 "--mah"，按呢台語究竟有講「嗎」無？

歸納起來，特別是參考劉克明先生1916年出版个《台語大成》，咱thang講：卡早个台語正實有按呢講，毋閣路用無像北仔話hiah-nī大，呼音嘛小可仔各樣[koh-iūnn]。

台語疑問詞 "--mah" 是講話者卜表達「反問[huán-būn]」抑是「推測[tshui-tshik]」个態度佮口氣个時，才罕罕--仔講一下。單純个疑問，著無塊講 "--mah"。以下兩句例，出自《台語大成》，漢字無改，假名注音改羅馬字。

「伊有如此[an₃₃-ni₃₃]講麼[--mah₁₁]？」講話者認為伊無按呢講，反問聽話者。

「彼個[hit-le] 辭職嘮[--looh₁₁]麼[--mah₁₁]？」比在講話者tsiah久仔來交關，攏無看著迄个辛勞，塊臆講伊辭職矣。

論到呼音个增差。往過[íng-kuè]个文獻大常攏寫做 --mah，咱掠卡無伊个實調。但是《台語大成》有記實調，是唸做佮第三聲共款个低調。

抑若現代台灣囡仔塊講个「嗎」，實際个呼音，差不多是台語第七聲中平調，檢采有略仔卡輕一sut仔。彼著是對台灣北仔話个「嗎」學--來个。

所以我即篇个題頭應該是：『台語有講「嗎[mā]」--mah₁₁？』

（2015-10-15補充：廈門話个白話字文獻，包括有教會背景个台語儂，疑問詞"--mah" 用了較捷，看起來並無反問用意个話句也有按呢講，這可能是無仝腔口个習慣用法有出入。重點是，本來个「--mah」是唸低調輕聲，毋是唸中調，若是唸中調，應該是後來受華語个「嗎」影響所致。）

慣勢講「嗎[mā]」个台灣囡仔，煞tsua̋n袂曉台語豐富个各種疑問表達法。佇遮簡單寫--幾條。

【真的嗎？】，台語講「正實=个？」、「咁[kám]有影？」注意台語个助動詞「咁[kám]」，這是華語無个，古文有，但是台語閣分 kám 佮 kánn。

單純疑問，【這是汝的嗎？】，台語講「這咁是汝个？」、「這是汝个 毋是[m̄-sī]？」、「這是汝个 是毋[sī--m̄]？」（句尾表疑問个「是毋」，往往連音做 "sim₂₁"）

反問，【這不是你的嗎？】，台語講「這咁毋是汝个？」、「這毋是汝个 是毋[sī--m̄ / sim₂₁]？」、「這毋是汝个--mah₁₁？」

【吃飽了嗎？】「食飽（矣）未？」（台語表示完成个疑問詞是「未[būe]」，thang講輕聲低調，亦thang講本調。漳个講buē，泉个講bēr/bē。這佮「bē曉」个"bē"無共款。「bē曉」个"bē"，漳个講"bē"，泉个講"buē"，顛倒píng。

【看見了嗎？】「有看--見/著 無[bô/--bô]？」（頭前用「有」，後壁配合个疑問詞尾是「無」－－「有[ū]、無[bô]」。「無」佇遮嘛是有本調佮輕聲兩種。

【汝要去嗎？】「汝卜去毋[m̄/--m̄]？」（配合頭前个「卜」，疑問詞尾用「毋」－－「卜[beh]、毋[m̄]」。

另外閣有一大堆疑問詞尾thang用：hinn₂₁、ni₂₁、siooh_21、hiooh₂₁、（後面即兩个是對「是無[sī--bô]」連音變來个）。遮个詞尾有方言差，毋是逐所在攏有。親像ni₂₁，高屏地區卡tsia̍p聽--見。我是屏東萬丹儂，上愛講hinn₂₁，罕得講hiooh₂₁、siooh_21。總是，我攏共學來講，我卡愛對別種台語腔去抾話語，卡袂愛對北仔話去承[sîn]話屎。

比較起來，北仔話个「嗎」夭壽簡單，只要是yes/no question，攏會用--得。台語毋是，變化蓋儕，相對來講，結構卡嚴密，愛配合頭前个助動詞，抑是時態。若卜像北仔話个單純，亦是可以，有疑問助動詞「咁」thang用：「咁有影？」「咁是汝个？」「咁毋是汝个？」「咁食飽矣？」「咁有看--見？」「汝咁卜去？」