台語有「市」--字个奇巧話

台語有「市」--字个奇巧話：敗市、食市、鬥市、市草、市秋、文市、武市、賊仔市。

敗市 pāi-tshī ：無景氣、物件無銷、落[lak]價。例：「發生核災，日本農產品煞敗市，世界各國攏毋敢閣進口。」

食市 tsia̍h-tshī ：形容濟儂出入，會來交關，好做生理个地點。例：「即搭卡食市，毋閣厝稅加足貴。像迄間生理遐好，嘛做袂落去，盡趁个攏提去予厝頭家矣。」

鬥市 tàu-tshī ：形容附近个店面，逐家生理做了有起，形成正面循環，唌[siânn]儂客一直倚來，tshiāng-tshiāng滾。例：隔壁間亦倒去，對面間亦欲做哪毋做，即條街仔袂鬥市，歹做生理。

市草 tshī-tsháu ：「草」是指狀況[tsōng-hóng]、情形，親像「漢草」是指體格个狀況。「路草」是指路況[hóng]、路線。所以「市草」著是指「市面个狀況、生理好䆀」。例：「Tsiah久仔，市草hue-hue--á，毋過，嘛著骨力做，罔趁才袂散。」

市秋 tshī-tshiu ：失業[sit-gia̍p]、賦閒[hù-hân]。例：「即幾年，讀到大學出業，無儂欲倩，蹛咧市秋[tuà leh tshī-tshiu]个儂袂講得濟，少年儂真失志。」

文市 bûn-tshī ：小賣市場/區域。
武市 bú-tshī ：批發市場/區域。

賊仔市 tsha̍t-á-tshī：買賣舊貨、抑是賊仔貨（賊贓[tsha̍t-tsng]）个市場。例：「阮蹛屏東庄跤，出門毋捌咧鎖跤踏車。高中走去台北讀冊，新車仔著準鎖咧兩三粒鎖，略仔無細膩，嘛會予儂偷牽去艋舺賊仔市賣掉。」