語文競賽台語朗讀稿，蔡櫻華〈𥴊仔店〉（Kám-á-tiàm）有一段：
彼當陣𥴊仔店誠時行，干焦外公厝附近就有兩三間。我佮小弟、阿芬猶有潘的攏會走去外公厝後彼條巷仔的𥴊仔店買「養樂多冰」，熱天食真正是透心涼，予人心花開。嘛會行去鹽埕國小閣過去的巷仔內彼間𥴊仔店抽獎。若是提著鬥字獎，仝款的字總是鬥袂峇，一直鬥袂著「臺」、「灣」、「是」、「寶」、「島」抑是「義」、「賊」、「廖」、「添」、「丁」。每擺外公予我的銀角仔，總是投資佇彼註死永遠抾袂著的第五字。
鬥字獎迄兩句話，共十字：
「臺」、「灣」、「是」、「寶」、「島」
「義」、「賊」、「廖」、「添」、「丁」
學生唸到遮，袂少指導老師真躊躇，毋知欲叫伊照規句話个變調方式去唸，抑是一字一字分開唸本調？
即个所在我毋敢提供唯一標準答案，因為無仝个評審，對這時常有無仝个見解佮堅持，有个會認為一定愛照朗讀稿个標點符號，分開一字一字唸本調，才算正確。
但是這真袂自然，表現袂出囡仔儂咧對獎个心情，較自然个做法是平常个變調，但是刁工拖長：
臺 灣# 是 寶 島#
義 賊# 廖 添 丁#
親像囡仔將一堆抽著个牌仔散開佇塗跤，一張一張試連看覓，喙哪踅踅唸，指頭仔哪比哪揣看鬥句鬥有成功無。我看這是效果較好个氣口，若無，十字逐字分開唸本調，無看稿个聽眾，可能會捎無摠。
較幼路个表演，毋是將即十字个每一字攏拖平長，可比講「臺」字拖長，親像哪咧揣下一字，唸到「灣」反倒轉變較短、強，袂輸是「喔，揣著矣」小可興奮个心情。唸到最後「島」、「丁」愛設法表現出一種「啊，『島』咧？『島』佇佗位？哪會無啦？！」迄種心情，可比講刁工唸予伊大舌：t.t.t.tó！雖然最後有唸出 tó，但是口氣真失望，「我倒矣！」，袂輸囡仔个手指頭仔是點佇最後一張紲落去已經無牌仔个塗面。哈，最後這是高段个表演，可能較適合錄廣播劇用。
Comments powered by Disqus.