「台語漢字本字派」佇遮特別指有以下主張个儂：台語有音就有字（漢字），而且台語文所用个每一字，攏愛有漢字文言文古文獻个根據，才是正確、文雅、值得採用个。
以下反駁迄種主張：
台語會使得用文言音讀中國古詩文，而且比北京話較接近古文原音，這無表示咱个白話也著處處完全符合中國古文獻个用法。
因為自然語言會不斷演變，包括語音、語義、語法各方面，咱个祖先有受文言漢文教育个儂，佔人口个比例真低，按呢，怹个口語會變化到超出文言文獻个範圍，脫離文言个拘束，是非常正常合理个代誌。
咱看康熙字典，每一个常用漢字，攏有收足濟種切音佮義項。咁講上古造字个時，早就按呢規定落來？無可能！絕對是後世个文人一直發展、分化个結果。連相對穩定个「死文言」都會一直演變分化，無法度全用造字本源來理解，莫[bo̍h]講是老百姓日日佇口頭使用个「活語言」？
中國古早文人，主要干焦關心文言文，這才是予怹去考較[khó-kàu]做官出頭天个倚靠，所以怹也罕得有儂肯詳細記錄百姓白話个發展、分佈，而且古早中國儂對語音个分析能力無好，是受著天竺「聲明學」（梵語文語言學）个啟發，才開始有小可仔進步，但是也一直發展袂出較明確精密个記音系統。
所以咱干焦倚靠怹所留落來个文獻，來查考台語本字，毋但資料傷少，內容也無可靠。
閣再講，台語有袂少百越非漢語个成分佇咧，是北方中國士大夫文人所毋捌个語言，佇福建經過一、兩千年个演變，北方貴族佮百越原住民融合，漢語文佮百越語言發生複雜个化學變化。這攏毋是頭殼內只有中國士大夫文獻个儂會得理解佮接受个。
照按呢來看，咱就了解，台語漢字本字派，怹認定有音就有漢字，而且佇文言古字典、古文獻揣會著根據个，才是正確个台語字，即種堅持是一種食古不化个癡心妄想。
自來閩、台語口語文學个記錄者，包括公認文雅个南管戲文，攏有相當个主體性，發展出閩、台語儂特有个漢字用法，這是近代个台語漢字本字派所輕視、忽視个傳統。
為著個人興趣，欲去稽考台語漢字，咱著尊重。有學者使用較全面、嚴謹个現代學術方法去揣台語漢字，確實也有真大个學術成果佮貢獻。
但是咱台語儂若規世儂顧咧揣台語本字，揣甲走火入魔，背後無自覺个心態其實是關心保護古貴族个死漢字，較大過關心保護咱父母个活台語，連一篇三百字个台語白話文也袂曉寫、毋肯寫，自欺欺人講愛等到每一字攏揣會著本字才會使開始寫，這是咧害台語，毋是咧救台語。
時代一直演進，科技一日千里，到今仔日个網路時代，咱對語文符號系統个設計佮應用，若無新眼光、新思維，欲按怎挽救台語滅亡个運命？佇咱即个半民主社會，設法引起多數儂來關心、愛用台語文，是閣較重要个代誌。
註：考較[khó-kàu]，是指參加科舉考試求取功名，即个詞已經變古早話。
Comments powered by Disqus.