台語用肩胛頭負擔物件个相關動詞：「夯[giâ]、擔[tann]、扛[kng]、揹[phāinn]、偝[āinn]、gî」。
一、夯[giâ]：用肩頭將重物夯起來。像：夯粟仔[tshik-á]、夯紅毛塗、夯石輪[giâ-tsio̍h-lián]（「舉重」）。夯車輪[lián]有兩種意思，一種是字面上个本意，就是將車輪夯起來；一種是刻薄个滾笑話，意思是予車軋[kauh]--死。
二、擔[tann]：用扁擔將一擔[tànn]物件擔[tann]起來。請注意，一擔[tànn]有兩頭，雙頭愛伨[thīn]予平重來擔[tann]才好。像：擔菜去賣。俗語「一頭擔雞 雙頭啼[thî]」。是按怎雙頭啼？因為另外一頭是幼囝，形容艱苦儂也著討趁，也著顧囝；閣一種解說是親像「雙跤踏雙船」按呢，無歸心、無專情，像厝內有某，外口閣咧鬥伙記[tàu-hué-kì]。家後[ke-āu]會用得公開（一頭擔雞），伙記仔毋敢予儂知，但是雙頭攏會啼，攏愛「應付」。
三、扛[kng]：兩儂以上合作。一前一後扛中央个重物。像：扛轎、扛𣛮[siānn]、扛棺材。
四、揹[phāinn]：用肩頭佮尻脊[kha-tsiah]去揹物件，一般無像「夯」个物件遐重；或者是卡靜態，無像「夯」帶有對低夯到峘个過程。像：揹冊包仔、揹加薦仔[ka-tsì-á]、揹kha-báng。
作孽[tsok-gia̍t]个謎猜[bī-tshai]：一个囡仔欲死欲死，揹兩斗米。（臆人體器官）
台語詞「作孽」佇遮是指，行為、言語違反「性禁忌」。不過，俗語也講「是天地所設，毋是弟子作孽」[sī thinn-tē sóo siat, m̄ sī tē-tsú tsok-gia̍t]，這是咧肯定儂有「性需求」，需要男女婚配，這是天地常理。
簡秋榮先生來指教：『khah早阮外媽做謎猜予阮臆[ioh]是講：一个老伙仔欲死欲死，揹2斗米。閣講：一枝柴仔[tshâ-á]liā-外長.中央一點糖，臆會tio̍h，予你舐[tsn̄g]』『舐阮普通是講「tsuīnn」.因為佮糖「thn̂g」押韻的觀係.所以讀做tsn̄g。』簡先生怹个腔口，分卡袂清 -h第八聲佮第七聲，伊講个「liā外長」，應該是「lia̍h外長」。簡先生怹是漳腔，講tsuīnn，即句予儂歹勢講答案个謎猜，應該是怹外媽對別種腔口个儂遐學--來个，若無，就是怹外媽个腔口佮簡先生無仝。
五、偝[āinn]（泉腔講 iāng），頂面「揹 phāinn」是揹物件，但是「偝 āinn」是偝囡仔、偝儂。偝囡仔个帶仔，叫做「偝巾 āinn-kin」。音、義、字攏有分。華語文無分，攏是「背」第一聲。即字佇台灣，漳腔个勢力卡大，泉腔儂个 iāng，愈來愈少用，煞干焦殘存佇「偝巾 iāng-kun」即个詞，若做單字動詞，普遍攏改講 āinn，致到語詞用法無一致。
六、gî：佮「懷疑」个「疑」仝音，有 g 聲母，毋是「姨 î」个音。意思是將儂（通常是細漢囡仔）夯起來肩頭坐，尤其是予囡仔雙跤分開佇大儂个雙爿肩頭，袂輸是騎佇肩頭按呢，所以台日典用「騎」--字來寫 gî。但是我無愛按呢寫，這無儂唸會好勢，不如直接用羅馬字。例：gî囡仔去𨑨迌；共囡仔gî咧看布袋戲。即个詞，蓋濟台語儂已經完全毋捌聽過，請多多愛用。^_^
Gî个動作，有儂講"giâ tōng-khīng"，我毋知影tōng-khīng是啥貨？請各位賜教。
吳嘉芬小姐來指教講：『阮是講呢! 猶閣有 阮阿爸攏講伊共戶口簿仔貼佇kha-phīnn-liâm，規家伙仔kháinn--leh!喝徙[suá]就徙......這的動作 也是用肩舺頭呢!』『阮母--也 囡仔攏是「用胳下去夾」。阮兜散赤 家伙kháinn咧（袂輸聖誕老人kháinn禮物）就搬徙。』夯[giâ]、攑[gia̍h]、撠[giah]，即三字是閣一組相關動詞，值得整理、分析。歡迎友志接落去做。欲講究台語，著愛有系統性个歸納、分析、討論，咱个台語程度才會凍快速提昇。
Comments powered by Disqus.