台語白話字文獻毋是攏寫白話

台語白話字（教會羅馬字）文獻並毋是攏寫「白話」，其實內中有袂少書面語、文言詞，只是佮文言古漢文比起來，當然是白話。但是以咱當今个台語程度來看，就會感覺遐个詞根本毋是台語白話。

咱袂使閣用自細漢佇厝內所學著个台語，來設想台語白話文應該按怎寫，迄種台語真正無夠用。

事實是，咱佇厝裡所學著个台語，連老大儂台語程度个十分之一都無。咱去學校讀冊，一節課內聽著老師所講个華語就超過咱規禮拜佇厝內所聽个台語囉，咱放學轉來閣愛寫一堆華語作業、準備大小考試，咱是有時間、有才調學著啥乜較深个台語--nih？像我根本捌無兩種青草仔名，阮老爸就逐項捌。

毋捌字个鄉親嘛會講出足有字眼个台語，另外，過去个台灣，閣有一寡冊讀較深个儂所講个台語，又閣是一種風格，這攏是咱个台語文化資產，咱應該有大腹腸，總kā抾轉來再利用。