有一遍，阮媽媽問我樓頂廳裡，神明tshat仔畫个，中央是阿彌陀佛，抑雙爿是啥乜神明？我講正手爿是觀世音菩薩，倒手爿是大勢至菩薩/Tāi-sè-tsì phôo-sat/(註)。伊聽做Tāi-sè-tsî，「至」第三聲聽做第五聲去。
即 个第三聲佮第五聲个分別，第三聲是自頭至尾攏kē調；抑第五聲是對kē調升峘起去。兩種聲調一開始攏是kē調，所以有可能糊混去。第五聲升起去个部份，若 講無清、聽無明，著佮第三聲kē調差不多；抑第三聲攏kē調，有時是講个儂个問題，親像我聲喉無好，欲講遐kē个音，後壁段有時會sau聲去，聽个儂頭腦 中處理語言理解个系統，自動調整補足，可能會補做上升調。即種調整，íng-íng牽涉著辭彙意義个理解。若是第三聲个迄字（詞素），聽个儂拄好毋捌，毋 過若換做第五聲，伊捌，伊个頭腦凡勢會共理解做第五聲；第五聲聽做第三聲亦是一理/it-lí/。
「記憶」，台語是講「記持」/kì-tî/，有儂講做/kì-tì/，理解做「記智」。有可能本底著有兩種講法，總是，辭典查無kì-tì个音。我是認為彼是照我頂面所分析个迄種糊混个結果。
昨 昏看著美力果个Facebook:
『忙亂的清晨,臨出門前,女兒的制服上衣鈕扣脫落,等不及脫下來,直接在身上縫上一顆新的.並唸咒語:
Chhēng lé thīⁿ，Chhēng lé pàng，Lōa gún chò chha̍t ê lâng，Chhùi seⁿ thâng。』
迄段「咒語」我毋捌聽過，總是，uì頂下句共判斷，第二句毋是Chhēng lé pàng（穿咧放），應該是Chhēng lé pâng（穿咧縫），佮後壁个lâng、thâng攏是第五聲。
台 語卡tsia̍p講「綻/thīnn/衫」，毋過嘛有「pâng衫」，即个pâng著是動詞「縫」个白話音，抑名詞「縫」/phāng/逐家著卡熟（佮華 語「縫」有ㄈㄥˊ、ㄈㄥˋ兩音，調類對應）。第五聲个「縫」/pâng/直透失傳去，致到/tì-kàu/傳承或者是記錄个時，掠做是第三聲个「放」 /pàng/。
頂回王昭華小姐佇伊个Facebook提起芎蕉一pî，伊是理解做一pìnn，嘛差不多會使得按呢解說。
以上，是一寡非定論个想法，通閣再討論、修正。毋是欲共美力果佮昭華掠包，失禮个所在，請包涵。
註： 「菩」雖是第五聲，台灣一四界變調攏唸kē調，這是因為泉腔文言音佇台灣卡有勢个關係。「阿彌陀佛」/Oo-mí tôo-hu̍t/个呼音嘛是按呢。「陀」个漳音是tô，變調是中調；抑泉音是tôo，變調變kē調，台灣攏取泉音。抑「阿」嘛有漳泉差，漳音/o/、泉 音/oo/，但是古音是/a/，演變个結果，呼音个舌位對low vowel升峘做mid vowel，官話佇遮嘛有共類个演變，「阿」ㄚ變ㄛ甚至ㄨㄛ。「陀」嘛是舌位升峘去矣，無，伊个母音共款是/a/。近年，一寡大德強調「阿彌陀佛」第一字 「阿」一定愛照原音唸/a/，可比講南懷瑾老師定定咧講，所以台灣佛教徒才漸漸改過來，毋閣，「陀」猶原無改。總是，無論唸啥乜音，虔誠心是最後決定个因 素。
Comments powered by Disqus.