以下討論台語粗俗話，無愛看即種討論个朋友，請毋通看--heh！不過，我是真嚴肅个學術討論。
tu̍h-lān 即个台語詞是歹聽話，但是社會上定定聽著，選舉投票有一種叫做「tu̍h8-lān票」，意思是指因為袂爽即黨，所以刁工將票頓[tǹg]予另外一黨个候選人。
tu̍h-lān 佇台灣華文也時常看著，寫做「度爛」，這台語漢字欲按怎寫咧？教育部無收即个詞。即个詞个解說至少有兩種意見：
一種是認為 tu̍h-lān 字面意義就是「『揬』著『𡳞』」（陽物予尖利个物件揬著），足疼、足氣，用這來比喻心情非常不滿、怨慼、受氣。
一種是台語本字老先覺陳先生个見解，伊認為是 tū-lān，漢字伊寫做「瀦卵」，伊个解說是：
『性交過後卵[lān]仍不拔出陰道，而令卵浸在淫水中。當然這也是表示對對方鄙薄的刻薄語，是表示極端反感的凌侮語詞。』
我個人感覺伊對即个詞字面意思个解說恐驚走爭去矣。台語有一句孽詰仔話：「褲底 袋針－－揬𡳞」，這是照頂面第一種解說个理路來講个，也是反映多數台語儂對 tu̍h-lān 个認捌。
陳先生講「卵」才是 lān 个本字，「𡳞」只是俗字（教育部目前个用字就是寫做「𡳞」）。lān 是男性外生殖器官个總稱（包括 lān-tsiáu 佮 lān-pha），伊認為古早儂造即个象形字「卵」本來是咧畫陽物，毋是咧畫 "egg"。
準做是按呢，「卵」台語後來已經用來表示 egg 矣，唸做 nn̄g，宜蘭漳腔唸做 nuī，無適合閣予「卵」字來負擔 lān 个音義，lān 應該另外寫別字較實用。「本字」佮「用字」个概念無仝。
lān、lān-tsiáu、lān-pha 無應該算做是粗俗話，這是人體器官个一部份爾爾，咱愛有健康、平正个心態來看待咱儂身軀頂个器官，若因為心理無平正，了後借用遮个器官名詞提來表達歹意思，正會共伊變做粗俗話。像 tu̍h-lān 就是粗俗話，不過，也有台語仙有完全無仝个解說。
Comments powered by Disqus.