「想」單獨一字動詞，咱即馬攏慣勢講白話音第七聲 siūnn，像「想有、想無、想代誌」。若是「思想」，咱即馬攏慣勢唸文言音 su-sióng，主要是表示較有理路个觀念，較有系統个迄款抽象思維、理論。
su-sióng 佇 1873 年廈英大辭典閣查無，到 1923 廈英大辭典補編、1931 台日大辭典才出現，台日大辭典有註明這是對日語詞吸收來个台語。
但是閩南、台灣閣較古早 本底有 su-siúnn，漢字也是「思想」，請注意「想」佇遮是唸第二聲个白話音 siúnn（這對現代儂來講，不可思議）。這毋但佇幾百年前留落來个南管曲詩 時常聽見，佇白話字教會公報內底也出現 390 遍以上，對創刊第二年个 1886 年到停刊前一年个 1967 年攏有。
su-siúnn 个意思，包含「思念、思慕」、「考慮、思考」、「系統性个觀念、理論」等等，兼動詞佮名詞，比 su-sióng 个用路較闊。
su-siúnn 即个講法，會用得講自幾百年前个閩南戲文一直延續到四十幾年前个台語語料內底，根本無希罕。希罕个是，按怎當今咱眾儂攏感覺 su-siúnn 真希罕？
以下是蕭藤村老師所整理个語料，感謝：
歌仔冊會講話，請咱看歌仔冊所唸的「思想」[su1-siunn2]、「思想」[su1-siong2]。
「思想」[su1-siunn2]
一盆牡丹在城墻 南風吹來香謝香 不時不日都思想 無疑今日看見娘
人心汝去拴衣裳 通甲官人離故鄉 汝今不通箱思想 是卜上京付考場
三伯冥日病思想 為着越州祝姑娘 無伊來看卜宰樣 叫伊來着罩主張
三伯冥日病思想 為着越州祝姑娘 無伊來看卜宰樣 我叫士久罩主張
也有一款野和尚 全然愛人兮姿娘 到因廟內着思想 隨時取出迷魂香
士久趕緊返家鄉 請出安人來思量 英台勸汝免思想 叫我共汝罩主張
小姐心內細思想 床頭一腳大皮箱 一个皮箱足大樣 一人來困真闊場
不才二項理事長 委員以外三四樣 代眾服務的思想 這是不才的主張
五九樹名是花樟 六十樹名號做粮 阿兄無返嫂思想 久年不識困仝張
仁心你去拴衣裳 通甲官人離故鄉 你今不通箱思想 是卜上京赴考場
心干爾个做爾想 爾身不是我个娘 不比永擺塊思想 収心早早返鄉里
心肝尔个做你想 你身不是我个娘 不比永擺快思想 收心早早緊回鄉
心肝僥雄不敢想 決心卜娶戀妹娘 免疑奸鬼起思想 也願汝我同一張
心肝爾个做你想 你身不是我个娘 不比永擺快思想 收心早早緊回鄉
日日夜夜塊思想 思思想想娘家鄉 時時刻刻塊思想 心心念念我呵娘
日來煩惱冥思想 折散一對好鴛鴦 孤單獨枕卜宰樣 民床皆忌困一張
因來担卜按宰樣 來去綉樓報阿娘 那行心肝那思想 折散一對好鴛鴦
孝子第一足肴想 因父形圖畫落箱 父親死了那思想 即提形圖來燒香
阮媽生成不成樣 小佛不敢得香香 看娘生水我思想 驚配未過水阿娘
阮罵生成不成樣 小佛不敢燒好香 看娘生水我思想 驚配袂過水阿娘
姜女無尪塊思想 加治心內有主張 金紙緊買几那樣 城隍廟內去燒香
姜女無尪塊思想 加治心內著主張 金紙緊買几那樣 城隍廟內去燒香
恰早冥日塊思想 不識夢兄困仝張 這擺明明有怪樣 明明神明指点娘
為娘煩惱卜侢樣 冥日心肝想到洋 害君冥日多思想 恰慘陳三為五娘
約娘卜來批一張 那可打騙小阿娘 暝日賬念兼思想 親像聖佛嗅香香
英台接銀四百兩 接來緊勸落皮箱 改勸母親免思想 三年那滿返家鄉
英台接銀四百兩 接來緊勸落皮箱 改勸母親免思想 三年就卜返回鄉
英臺接銀四百兩 接來緊勸落皮箱 改勸母親免思想 三年就卜回故鄉
捉着姦情鬧一場 用計起火放郎走 爹媽送銀趕出鄉 大郎無情目思想
暝日賬念兼思想 親像聖佛嗅香香 二人相好日日親 我娘痛君用心神
歌是市面人定唱 阮編甲人無同樣 此鏨英台塊思想 姓祝不時念姓梁
「思想」[su1-siong2]
不是小弟兮僥雄 接着批信姑不章 汝是不通箱思想 漸且忍奈帶學中
不是小弟兮僥雄 接着批信姑不章 汝是不通箱思想 漸且忍耐帶學中
不是小弟做恰雄 接着批信姑不章 汝是不通箱思想 漸且忍奈帶學中
不是小弟做恰雄 接着批信姑不章 汝是不通箱思想 漸且忍耐帶學中
延路那行那思想 跨返來去咱家中 賤婢蓮蓮即無諒 對阮兄嫂偷參詳
為夫不時都思想 相見敢着眠夢中 子有孝心奏聖上 欽賜完婚回故鄉
就者不時都思想 三更半冥眠夢中 喚七喚八亂亂兩 眠夢返去因故鄉
賢弟真正無肚量 好嘴塊共汝參詳 程候散學免思想 咱即相娶回故鄉
賢妹情深意極重 險險誤解汝僥雄 在我心內塊思想 相見敢着眠夢中
Comments powered by Disqus.