本文
台語有个輕聲，是表現佇句法功能，像「行--出--去、行--入--來、走--落--來、peh--落--去」，即種个，會使自由替換動詞，所以較容易活用，欲新造例句真簡單。
但是另外有一種輕聲，出現佇台語詞彙內底，是詞彙成分在內，通常攏是古早古早留落來个口語詞，雖然白話，卻是高階个表現法，咱現代欲閣新創即種輕聲語詞，就非常困難矣，而且舊詞也有流失个現象，像：
「做--儂 tsò--lâng」佮「做儂 tsò-lâng」無仝意思。「做--儂」是查某囡仔親事匹配予=儂；「做儂」就是一般个為人處世。
「日--時 ji̍t--sî」 （華語〔白天〕）；「暝--時 mê--sî」（華語〔夜間〕），用名詞「日」佮「暝」做語義中心，唸本調，「時」是附屬个詞尾，唸低調輕聲，指迄个時段。比較另外一个類義詞「暗時 àm-sî」就無唸輕聲，是照普通變調，這是因為「暗」是形容詞、修飾語，所以愛變調。
教阮漢文个漳州莊先生，伊定定講「日--間 ji̍t--kan、暝--間 mê--kan」，字眼無仝，但是構詞原理仝款，前字採用本調，後字用低調輕聲。
「日--時」若後壁加一个「仔」咧？就變非常特殊个唸法：「日時仔 ji̍t#sî-á#」 無閣唸輕聲，但是第一字「日」猶原唸本調，第二字「時」唸一般變調，尾字「仔」本調。講伊特殊，是因為照講干焦主謂結構複合名詞，像「地#動」按呢才有第一字唸本調个情形，「日#時仔#」毋是主謂結構，煞嘛按呢唸。這阮屏東萬丹時常聽著，抑「暗時、暗時仔 àm-sî-á」也漸漸取代「暝--時」。
口語「小--儂 sió–lâng」，前字本調，後字低調輕聲，就是書面語「草民 tshó-bîn」，是古早老百姓見官个自稱，但是書面語就照普通變調爾爾。
普通變調个「官儂 kuann-lâng」是做官儂个家後抑是家丁對伊个稱呼，像歌仔戲中，聽會著奴才咧講：「阮官儂--ā 無佇咧」。若是「官--儂 kuann--lâng」，前字本調，後字低調輕聲，是指官吏、官府个通稱，像講「官--儂 毋准百姓蹛遮開墾。」
書面語「仙人 sian-jîn」照一般變調，但是「仙--儂 sian–lâng」是特殊讀法，前字本調，後字低調輕聲，俗語：
「仙--儂頭殼碗髓」[Sian–lâng thâu-khak-uánn-tshué]，指非常難得、高貴个物件。
「仙--儂扑鼓有時錯」 [Sian--lâng phah-kóo# ū-sî tshò#]。這目前閣真濟儂用，總--是，往往改唸一般變調 sian-lâng 去矣。
俗語：「有時星--光；有時月--光」[Û-sî# tshinn--kng; ū-sî gue̍h--kng]，意思是儂个時運，有時䆀，有時好。迄个「光」本是唸輕聲，但是現代儂學即句真濟攏毋是按呢唸矣。
台語輕聲个變化真複雜，教羅、台羅个記號無夠用。表音記號無完備，教育、傳承無四序，會予即種高階、幼路个台語表達法閣較緊死失。
面冊網誌留言
洪熙文
借問潘老師：雖然「來」、「去」等表示方向的後綴一般是輕聲的，頭前彼个動詞也唸本調，但是，當後壁有賓語的時陣，我聽著的煞是動詞、後綴攏唸變調。譬論講，「伊的冊予人提去矣」唸「i-ê tsheh hōo lâng the̍h–khì–ah」（提唸本調，後壁兩個音節唸輕聲）。但是「伊的冊予人提去辦公室矣」我聽著的煞是「i-ê tsheh hōo lâng the̍h-khì pān-kong-sik–ah」（提、去兩個攏唸變調）。敢有影？
潘科元
即種現象是正確个口語：後壁接賓語了後，就恢復正常變調，台灣、福建大概攏是按呢。因為結構無仝，對應無仝个聲調行為，也是合理个。但是白話字文獻，抑是日台教材文獻往往即兩種句式攏標輕聲，這無合理，我無啥相信成百年前 有賓語个情形也唸輕聲。
洪熙文
多謝老師的指教！
張阿天
軽聲符大概是白話字文献上捷漏勾个一項。こ有、台語主流腔軽聲上少有二種、白話字目前無て分。
張阿天
寫漢字个時ま真欠用標軽聲个方式。目前个共識吤成是「免標逐个攏ま知」。特別是「–ê」若寫做漢字こ無標軽聲、感斍伤「重」伤「鎮て」、卡適合寫「汝个、我个」ひ个本調个「个」。茲是我対使用个経驗來講个。
Sky Rainbow
逐擺讀先生个文章攏會凍得著真大个啟發！
潘科元
我攏隨意寫寫咧，真見笑。
洪熙文
先生干焦隨意隨意寫，著愛閣較佩服你 o.o
潘科元
馮先生對外國來，無偌久就將阮个母語學到即款程度，才是予阮大呵咾、大感服！
洪熙文
傷呵咾啦，台語講佮並我較好的學者遮爾濟。母語者就免講，是袂當【相提並論】:D
Comments powered by Disqus.