台語詞「改變」文白音意義有分

舊約箴言(29: 20)兩版本比較：

一、委辦譯本文言聖經(1855)：「愚者猶可望其改過，造次者終生絕望」

二、馬雅各台語聖經(1884)：Gông-lâng iáu-kú thang ǹg-bāng i kóe-pìⁿ, lām-sám ê lâng chi̍t-sì-lâng bô thang ǹg-bāng.

（戇儂 iáu-kú通向望伊改變，濫糝个儂 一世儂無通向望。）

即段支持我講過个話：「改變，若唸白話音 kóe/ké-pìⁿ，是特別指『改過向善』，毋是任何个改換變化」，若唸文言音 kái-piàn 是近代講法，才是通稱用法。

台語詞即種精密分化，毋是漢字表達會出个，但是若攏總hìⁿ-sak漢字，又閣會變做兩組發音全然無仝，但是意思閣有包含關係个詞，學習者个腦神經較歹建立聯結，也減少一層興味。

總--是，毋通傷過倚靠漢字，著透過規節文例个閱讀，來掌握 ké-pìⁿ 佮 kái-piàn 个差別。

註一：「改」白話音有腔口差，ké 是漳腔，kóe 是廈泉腔。現時一般台灣儂攏已經毋知即字有白話音，一律唸文言音 kái。「變」白話音 pìnn 雖然閣有咧用，出現率也差早年真濟。

註二：「改變」唸文言音 kái-piàn，對咱來講，蓋捷用著，但是1885年 創刊个教會公報出到 1921.11，36年後个第 440 卷才頭擺出現。但是白話音 ké-pìⁿ 佇十九世紀尾15年間初期个教會公報，就出現 49 遍；kóe-pìⁿ 嘛出現過 5 遍。

台語真濟語詞，本是唸白話音，後來改唸文言音，有个意義無變，有个有變，我咧臆，這多數是佇日本時代開始發生个。

三、佇無講 kái-piàn 个年代，"change" 个通稱，有講「變換 piàn/pìnn-òaⁿ」。