台語詞：白飯、清飯

有台語先進主張講，華語〔白飯〕，台語袂使得講【白飯 pe̍h-pn̄g】， 愛講【清飯 tshing-pn̄g】，抑是【白米飯 pe̍h-bí-pn̄g】。

我正經毋捌聽過阮遮个鄉親講「清飯」，干焦有聽過賣早頓--个講【清糜 tshing-muâi】， 若是「白米飯」我聽過蓋濟台語儂也有講 【白飯 pe̍h-pn̄g】，包括阮序大儂。

我是真歡喜閣學一个「清飯」个講法（佮【凊飯 tshìn-pn̄g】－－華語〔冷飯〕－－無仝）， 總是，欲否定台語有講 pe̍h-pn̄g，這無合語言事實咧。

也有台語前輩講，台語「白飯」專指「跤尾飯」，拜往生者才會使講。 這我認為毋是「白飯」唯一个用法。

「白飯」、「白米飯」佮「清飯」佇廈英典、廈英典補編、台日典攏無收著！ 扑算當時只要講一字「飯」就有夠表達。

佇教會公報，pe̍h-pn̄g 捌出現過一篇(1930.02)，pe̍h-bí-pn̄g 捌出現過兩篇 (1940.10、1963.03)。教會公報無出現過 chheng-pn̄g。

閣用「台語文數位典藏資料庫(第二階段)」个全文檢索， pe̍h-pn̄g 會使揣著兩篇散文(1959 林泉生、2002 李和惠)，一篇詩(1991 顏信星)。 另外，pe̍h-bí-pn̄g 有一篇(1999 張聰敏)，若是 chheng-pn̄g 就揣無。

以上所有个詩文當中个 pe̍h-pn̄g 攏是指「白米飯」个普通意思。

「白飯、白米飯、清飯」即三个詞，教典攏有。教典「白飯」个釋義干焦一條， 就是〔白米飯〕，近義詞收「跤尾飯」。教典「清飯」个釋義也干焦一條： 「不加入其他調味或配料的白米飯」，近義詞有收「白飯」佮「白米飯」。

較好的做法，我認為教典「白飯」應該列兩條義項，一條就是一般義〔白米飯〕， 一條是專指〔倒頭飯。人往生的時候，供祭在往生者腳尾的飯。〕 按呢，第一義項个近義詞就是「白米飯、清飯」，第二義項个近義詞才是「跤尾飯」。

以下列一寡台語詞，有一般的[tik]个意義（也是本義），也有引申个特殊意義：

• 【大厝 tuā-tshù】：一、大厝宅。二、棺材。
• 【查某 tsa-bóo】：一、女人。二、情婦、風塵女。
• 【白飯 pe̍h-pn̄g】：一、白米飯。二、跤尾飯。

咱無應該講遮个詞干焦是第二種意思。咱揣會著濟濟語料佮生活實例， 通顯明遮个詞明明閣有第一種正常意思咧通行。不而過，我也知影， 有一寡儂會避免使用遮个詞來講第一種意思，怹會用可比講【大厝宅 tuā-tshù-the̍h】、 【查某儂 tsa-bóo-lâng／查某--个 tsa-bóo--ê】、【白米飯／清飯】來表達。

另外，可能也有年代、地區、年齡層、性別、職業，種種無仝个差異。台語毋是干焦一種腔。

（本底發表佇 Facebook 2023-07-12 個人動態）