台語講「記念」，毋是「紀念」

【台語講「記念」，毋是「紀念」】

相片个地點是佇中部山線泰安舊驛，昭和十三年(1938年)所設立个「台中線震災復興記念碑」。

咱台語所講个「記念」就是佇日本時代吸收日語漢字詞來个，念做 kì-liām 一直到今無變，是「記念 kì-liām」；毋是「紀念 kí-liām」。

「紀」佮「記」華語濫做仝音，但是台語無仝音（保存古音分別）；「記」台語是第三聲 kì，但是「紀」台語自來个文獻佮耆老攏是講第二聲，絕對無唸做第三聲。近年个台語字典（包括教育部台語辭典），有編者毋捌，將 kì 收入做「紀」个一音，這是錯誤。

咱台灣儂講「記念」前字著變高降調，毋是「紀念 kí-liām」前字變高平調。教阮古文个莊老先生，是佇中共統治下 走反來台灣个漳州儂，若伊是講「紀念 kí-liām」，彼是中國福建話，毋是台灣話。

「紀」讀 kí，像「年紀 nî-kí、世紀 sè-kí、紀元 kí-guân、紀仙姑 Kí-sian-koo」（「紀」若毋是佇尾字，愛照規則變調變第一聲）。

「紀」另外口語有儂講 khí，像「我大伊 一紀[khí] 年」，即个「紀」是「十二年」个意思，也有儂佇即種意思猶原講聲母無送氣个 kí。無論按怎，「紀」个台語只有第二聲 一種調，袂使唸做第三聲。

---

2013-06-11 更正：

我看著台日典个解說註明「國」--字，煞無閣去稽考福建个資料。即陣去查 1873廈英大辭典，看著伊確實有收 kì-liām，另外佇 1896/12 第141卷 台灣府城教會報也有用著「kì-liām Chú ê in-tián（記念主个恩典）」，這無啥可能佇1895日本領台隔轉年，台語就對日文吸收著「記念」。

按呢我無應該講台語个「記念」是對日文來，著愛更正：台語个「記念」佮日文相通。總--是，台語「記念」佮華文慣勢用法「紀念」確實無仝，咱台文毋通綴華文寫。

廈英典有收「kì-liām」、無收 kí-liām（紀念），到甲 1923 廈英典補篇就有收十捅个「紀念 kí-liām」佮伊个複合詞。因為日文攏寫「記念」，所以補篇遮个「紀念」个詞，大概是當時吸收民國華文用字來讀个。總--是，我自細漢就毋捌聽儂講「kí-liām」。