一、台語若是前字變調，後字本調个兩音節詞，通常前字是弱音節（抑是叫做輕音節），後字是強音節（抑是叫做重音節）。弱音節就是講唸較細聲、唸較短，強音節就是講唸較大聲、唸較長。即種強弱、輕重音節个變化，因為咱咧講話个時，攏會自動去調整，若用儀器來測量，結果會比咱感覺會出來--个閣較明顯。
台語即種強弱音節个性質，佮英文多音節字有強弱音節閣無仝，英文迄種有辨義作用，但是台語个輕重音節，是咱咧講話个時自動去調整，予話句分出單元，較有重點，聽起來較順个作用，通常無辨義作用。
若欲舉例，揣前字、後字「調型仝款」个詞來試較明顯，像「火車（高平調+高平調）、花市（中平調+中平調）、會試（低調+低調）、貨品（高降調+高降調）」。這就感覺較會出來後字較重、較強、較長。若是後字是入聲字，就會感覺無遐長，但是基本上猶原算是「強音節」，就是發音个時較強調。
不過，也是有例外，像小稱詞「仔」詞尾，通常就毋是重音節，可比「金仔 kim-á」，咱咧講「金仔 kim-á」，前字韻尾 -m 時常會牽連去後字，予後字 á 生出一个 m- 聲母，袂輸變成 kim-má 个音。各位試想，「金仔」標音寫做 kim-má，咁毋是佮「金馬 kim-má」（金門馬祖簡稱）完全仝音矣？
實際上有猶原有差，一來「金仔」个尾音節是弱音節，無像「金馬」个尾音節遐爾強、遐爾長，二來「金仔」後音節 má 迄个生出來个 m- 聲母，雙唇並無真正像「金馬」个 má 合甲遐出力，是輕輕仔接觸一下爾爾。
了解頂面个觀念了後，閣來第二个觀念：
二、台語教學个變調口訣，可比講「三變二」（第三[sann]聲變第二[jī]聲），閣有「喉四聲也變二」（喉四聲就是 -h4，入聲韻尾用束喉音收尾个第四聲）。所以下面每一對兩字詞（閣有三字詞組），前一个詞个前字是第三聲，後一个詞个前字是 -h4，一旦變調了後，對台灣絕大多數儂來講，唸起來就變仝音詞，無分別矣。
「照鏡 tsiò-kiànn」vs.「借鏡 tsioh-kiánn」
「過身 kuè-sin」vs.「郭新 Kueh Sin」（儂名）
「剃頭 thì-thâu」vs.「鐵頭 thih-thâu」（泉腔「剃」本調嘛是 thih，佮「鐵」無論本調、變調攏仝音）
「倒跤 tò-kha」、「桌跤 toh-kha」
「豹面 pà-bīn」vs.「百面 pah-bīn」
「剉樹仔 tshò tshiū-á」（砍伐樹木）vs.「𧮙樹仔 tshoh tshiū-á」（咒罵樹木）（部份宜蘭儂即兩个動詞本調攏唸 tshò）
所以咱咧教台語个時，會教講：喉四聲變調了後，會失去束喉音，變成高降調，親像第二聲个感覺；這佮第三聲變調成為高降調，親像第二聲按呢，是變仝款个調。所以口訣就是：三變二，-h4 嘛變二。
但是，佇音值上、音響物理上來論，佇變調位置个高降調，佮第二聲本調高降調有淡薄仔出入，毋是一模一樣，因為咱第一項觀念有提起，兩字詞前音節會唸較輕、較弱，致使第三聲也好，-h4 也好，變調个時，袂拖到遐長、降到遐低。
像「貨品 huè-phín、廢水 huì-tsuí、血水 huih-tsuí」雖然口訣講前字會變第二聲，但是佇音值个層次來看，其實前字並無唸甲親像後字遐爾長、遐爾低，若用五調階來記聲調，前字是 53，降到一半爾爾，後字是52 甚至 51。而且按呢个聲調數字記法，表現袂出長度，實際是前音節較短，後音節較長。
因為前字會唸較短，所以著愛較早將聲音結束，來換唸後音節，為著欲將前音節切斷，咱嚨喉由兩條「聲帶」圍成个「聲門」著愛小可仔激力，束一下，切斷前音節个聲。即陣，耳空真利个儂，就可能會聽著有「束喉音」（glottal stop）个效果出來，但是即種束喉音並無辨義作用，無論是佇 -h4 變調，抑是第三聲變調，攏有可能出現。
親像「蒂 tì」明明是第三聲个字，但是阮聽鄉親咧講「蒂頭仔 tì-thâu-á」，其實迄个變調了後个「蒂」怹定定講短短--仔，感覺音節尾有一个束喉音佇遐，佮「滴頭仔」無分別（無「滴頭仔」即種詞，總--是，會使試唸來比較看覓）。
-h4 本調韻尾个束喉音是佇「音位」層次，有「辨義作用」个束喉音；但是 -h4 變調成為高降調，佇聲音收束，接落去講後音節个時，聲音過渡个時可能會出現个聲門收束效果，即種「音值」層次个束喉音，佮有辨義作用个束喉音無仝性質。
咱猶原會使繼續教講：-h4 變調了後，會失去束喉音（有辨義作用个束喉音），變高降調，親像第二聲。
音位層次个討論，佮咱一般鄉親个語感有相應。咱多數个鄉親，真正分袂出來「照鏡」佮「借鏡」講出來有啥差別！咱揣兩位鄉親來實驗，叫第一位唸「去『借鏡』」，錄音起來放予另外一位鄉親聽，問伊：這到底是咧講「去照鏡」抑是「去借鏡」，伊可能是講「攏仝音」，若無，因為「照鏡」是較捷講个話，伊會選即个答案个可能性，我相信加[ke]真大。這實在是因為「借鏡」佮「照鏡」咱多數台灣儂聽起來根本無分別个關係。
因為第三聲變調了後，佮 -h4喉四聲變調就分袂出來矣，所以台語儂有一寡本來是第三聲變調个詞，欲恢復本調个時，會拂毋著去，當做喉四聲咧講。我做兵个時，聽著通訊兵講「架線 kà-suànn」，但是伊唸單字動詞个時，是講做「kah」，像「線 愛先 kah」。
毋但阮即沿有即種問題，連阮老爸怹迄沿个八九十歲儂，仝款有即種現象。像「注射 tsù-siā」个「注」明明是第三聲本調，但是怹有時會講出「營養射 著愛 tsuh」即種話。
配合音位觀念个教學口訣，才是較理想个教學法，無必要強調一寡傷幼个語音細節，親像頂面分析迄種「無辨義作用个束喉音」，這無需要佇基層教學現場來提起。
但是若欲教機器儂講台語，親像做語音合成个電話語音、公共場所放送，上好毋通干焦根據教學口訣講「三變二」，就只錄第二聲本調唸較長、降較低个音，了後也提即个第二聲本調音來用佇第三聲變調个位置，致使兩音節詞前後無輕重个變化，按呢雖然咱儂耳也是聽有，袂啥會誤解，問題是聽起來就是礙虐礙虐，無成真儂發音，因為違反咱「前音節較輕較短、後音節較重較長」个講話習慣。
以上是講「喉四聲變調」佮「第三聲變調」个關係，閣論到「喉八聲(-h8)變調」佮「第七聲變調」也是仝款道理，變調了後，有可能佇調尾出現束喉音。但是即種束喉音並無辨義作用，是可有可無个存在，所以咱猶原佇教學上教講「喉八聲變調了後，會失落束喉音，變成低長調，佮第七聲變調了後仝款，無分別矣」。台灣中北部有真濟所在个儂，連喉八聲本調个束喉音失落去，變成佮第七聲本調嘛無分矣，致使怹欲記喉八聲个字，特別食力，這我以前有討論過，著愛靠文言音个唸法來幫助記憶。
閣講著「七變三」即个口訣，舉例像「會 huē」、「話 uē」本調攏是第七聲中平調，但是「會話」即个詞前字會變調，親像第三聲，按呢「會」就比「話」較低調矣。「七變三」，也是音位上經過適當抽象化了後个方便口訣。其實佇音值上，第七聲變調了後，是變低平調（五調階寫做 22 較妥當），但是第三聲本調个音值是低降調（五調階寫做 21 較妥當），會拖較長、降較低，但是咱一般台語儂袂計較甲遐幼，感覺無差。
因為即兩个調是「互補分配」：22 是出現佇變調位置，21 是出現佇本調位置，延用「音位學」个觀念，即兩種會使算做是仝款「調位」，所以咱簡單講「七變三」。除非汝天生音感特別好，抑是有音樂个記譜訓練，就會感覺無啥仝。總--是，佇教學上，毋通了工去強調即種差別。
「音值」、「音位」、「辨義作用」、「互補分配」是現代音韻學第一基本个概念，想欲進一步了解，會使去網路揣音韻學个教學影片，抑是去買、去借音韻學个冊來讀，抑是去大學相關个課程旁聽（英文系个語言學概論課可能愈好，設使汝無英文障礙）。何大安教授有一本《聲韻學中的觀念與方法》寫了真好，可惜出版社倒去矣，著愛去圖書館借，抑是買二手冊。
Comments powered by Disqus.