（2015-12-27 我發表佇面冊，轉貼來遮，有做淡薄仔增補）
今仔日演講，有強調通俗講法「台語入聲變調：四、八互變」無妥當。佇遮簡單解說重點：
口四聲（也就是 -p/-t/-k 收尾个第四聲）个變調，台語各種腔口攏變做高短調，問題是台灣第八聲唸高短調个所在只是一部份，當今發展个大趨勢，中北部多數儂第八聲並毋是唸高短調，若是按呢，咱教怹「四變八」个口訣，實在無合怹實際个第八聲，也無尊重怹个腔口。
閣論到第八聲个變調，其實是變出低調，比第四聲本調个中短調較低一階，比較「綠竹、直接、六角、特質」就知第八聲个前字變調了後絕對比第四聲个後字本調較低音，即種低短調，是呼八音本調內底無出現个調型。
早期个閩台語教育家，可能是為著方便，抑是因為審音無夠講究，結果就制定出「變調循環」个口訣佮圖解，殊不知[sū-put-ti]，台語並毋是只有迄七種調值佇遐循環變來變來爾爾。
但是我煞袂記得提出建議替代个口訣：「台語入聲變調：四變懸、八變低」。
把握「四變懸、八變低」个大原則，閣進一步分析：
「四變懸」：口四聲 (-p/-t/-k) 變調是懸短調，若是喉四聲 (-h4) 因為束喉音韻尾是無穩定个音，佇變調个時，會失落入聲促音个成分，致使聲音拖長，變成高降調，總--是，伊个調頭猶原是懸音，所以「四變懸」个口訣猶原適用。
「八變低」个情形，口八聲 (-p8/-t8/-k8) 是變低短調，若是喉八聲 (-h8) 也是佮喉四聲 (-h4) 變調仝款个道理，因為束喉音韻尾無穩定，佇變調个時失落，聲調無受促音阻擋，拖長去，變低長調。所以口八聲、喉八聲个變調攏是「八變低」。
若是拄著小稱詞尾个「仔前再變調」，彼是特殊變調，有額外个規律。
補充：台語 4 聲 佮 8 聲，真濟儂本調無分。但是變調唸出來就有真明顯个懸低差別。所以欲記憶佗一字是第四聲，佗一字是第八聲，會使想例詞來鬥記，例：
沐[bak4]：沐水，前字第四聲變懸調。
墨[ba̍k8]：墨水，前字第八聲變低調。
德[tik4]：德國，前字第四聲變懸調。
敵[ti̍k8]：敵國，前字第八聲變低調。
濕[sip4]：濕氣，前字第四聲變懸調。
習[si̍p8]：習氣，前字第八聲變低調。
以上是演講後个 sa̋-bì-suh，就是「講後服務」（káng-hiō ho̍k-bū）。
Comments powered by Disqus.