台語 sui 即个音，有寡心適、特殊个意思佮用法，來整理一下，對好解說个先列起：
一、雖 sui：書面語來个字眼，台語有用著「雖然 sui-jiân、雖罔 sui-bóng、雖是 sui-sī」做連接詞。
二、荽 sui：華語〔香菜〕，台語「芫荽 iân/ian-sui、ian-suinn」，金門、馬公講 uan-sui。
三、衰 sui：特指帶孝[tuà-hà]个衫、孝服[hà-ho̍k]。像「斬衰 tsám-sui/sue」是父母三年喪个孝服；「齊衰 tsu-sui/sue」是一年喪个孝服。「衰」若做「衰弱 sue-jio̍k」个意思，干焦會使唸做 sue，毋通唸做 sui。
四、蓑 sui：棕蓑[tsang-sui]，用棕毛做个雨幔[mua]，就是〔蓑衣〕。孽詰仔話：粽蓑胡蠅－－食毛[môo]。佮「食無[bô]」倚音雙關。
氣象俗語：「田嬰結堆，著穿棕蓑。Tshân-inn kiat-tui, tio̍h tshīng tsang-sui.」、「烏雲飛上山，棕蓑提來幔。Oo-hûn pue tsiūnn suann, tsang-sui the̍h lâi mua.」。田嬰倚做一堆，抑是烏雲聚集佇山頂，攏表示會落雨。
五、繐 sui：（教典用字，註明是替代字）直接引用教典：
『
1.（名）平行散開的細線，以細絲線束成，可垂掛於旗子、桌巾等物品四周的裝飾物。例：桌巾繐 toh-kin-sui(桌巾四周的裝飾絲線)、旗繐 kî-sui(旗幟周邊的裝飾絲線)。
2.（名）額前或兩鬢垂落的髮絲。例：鬢繐 pìn-sui(鬢毛)。
3.（動）布料周邊的織紋鬆開散落。例：布邊繐去矣。Pòo-pinn sui--khì--ah. (布料邊緣的織紋鬆開了。)
』
「繐」也會用得做形容詞，像「繐繐 sui-sui」, 就是毛、絲散亂个款式。
六、𦉎（左「缶」右「崔」）sui：茶罐个出水口叫做「𦉎 sui」，號做「茶罐𦉎 tê-kuàn-sui」。茶罐𦉎个製作，考驗師傅个功力，有个茶罐真好斟[thîn]茶，叫做「好出𦉎 hó-tshut-sui」；有个茶罐𦉎做了無好，哪斟茶哪「垂𦉎 sē-sui」，滴甲一四界，真惱[lóo]。
「垂𦉎」就是指茶水會順茶罐𦉎个邊--仔流滴落去，這有足濟講法：梘𦉎 khiō-sui、𦉎蹬 sui-tenn/tinn、垂𦉎 sē-sui、垂蹬 sē-tinn(泉)、垂蹬 suē-tenn(漳)。
「落𦉎 lak-sui」也講「落殼 lak-khak」，是失運、失體面个意思。佮「落衰 lo̍h-sue」小可倚意。
俗語：「講話有𦉎無捾[ū sui bô kuānn]」，是指講話膨風、無根據、濫糝講東講西。「有𦉎無捾」即个成語真妙，因為「𦉎」是出水口，「捾」是手咧捾茶罐，控制斟茶个所在，「有𦉎無捾」按呢話咧講就親像無捾个茶罐咧倒茶，袂撙節[tsūn-tsat]。
類似个俗語：「有𦉎無蓋，大坩無底」[Ū sui bô kuà, tuā khann bô té]，歕雞胿、講大話个意思。
名詞「𦉎」有兩路引申，一路猶原是名詞，因為茶罐𦉎个形體，有成男性器官，尤其足成細漢查埔嬰仔个陽物，功能上來論，也攏是流出液體个出口，所以將男性器官个頭前叫做「𡳞𦉎 lān-sui」，華語〔龜頭〕。
補充解說：「𡳞 lān」是陽物个總稱，進一步分做「𡳞𦉎 lān-sui、𡳞鳥 lān-tsiáu（陰莖）、𡳞脬 lān-pha（陰囊）、𡳞核 lān-hu̍t（睾丸）」，即四个兩字詞基本結構仝款，前字是整體名稱，後字是部位名稱。
「𦉎」閣一路引申，是變動詞，像講「水對壁 sui--落去」, 就是水順壁垂[suē]--落去。這種動詞用法到底是毋是名詞「𦉎」个引申、轉品（改變詞性）？我看有可能：
咱看頭前有提起「垂𦉎 sē-sui」也講「sui-tinn/tenn」，即个「sui-tinn」應該是「及物動詞+名詞受詞」个複合詞，「蹬 tinn/tenn」是茶罐𦉎向外个邊緣，形體 uân-uân 有弧度，像咱儂个跤後蹬，茶水順即个「蹬」sui--落去，就叫做「sui-tinn」，這扑算就寫做「𦉎蹬」。前字「𦉎」已經轉做動詞。
七、sui：食酒享受个意思。親講「燒酒 三頓sui」，就是一日到暗啉酒享樂个意思。這有可能就是頂段「水對壁 𦉎 [sui]--落去」閣引申來个。按怎講neh？來看以下幾種食酒動詞个相關用法：
1. 來去沃[ak]--一下：酒伴相招去食酒，定定按呢講，是將儂比喻做花草，無水會蔫[lian]--去，需要沃水，按呢，食酒儂無食酒會癮[giàn]、會艱苦，嘛著愛「沃」--一下。
2. 來去濕[sip]--一下：比頂面「沃--一下」較婉轉，「沃」是暢飲[thiòng-ím]，「濕」是予伊濕澹[sip-tâm]著好，也就是細細喙仔啉，小飲[sió-ím]、小酌[siáu-tsiok]--一下爾爾。出名个歌詞：「咱若是心頭結規球，著來濕--一下、濕--一下，偌好汝咁知？」當然啦，定定攏嘛啉落去到塊，就毋知天地、無站無節啦。
有先進講即个 sip，是英文 sip 來个，我無採用，因為台語罕得按呢直接吸收英語詞，若欲吸收 sip，會先講 sip-puh 較有可能，但是食酒个 sip 並無即个階段。不如將「沃」佮「濕」兩種概念來做貫串个解說，免的確著牽對外來語去。
3. 來去 sui--一下：這我是解說做啉甲真爽快，酒自然會對喙角 sui--落去，所以用 sui 來表示食酒享樂个動詞。也有結合 1 佮 3，講「來去沃佮sui」。
臧汀生教授主張即个 sui 个詞源是日語文「粋」(すい），伊寫講：
『{粋} (すい）讀做su-i.是漢字{粹}的俗體.本義為{精華}.引申而有聰明.風流..等等意思. 台灣老長輩將其中的風流義 又再引申出{享受}義.又因享受必不離喝酒.後來幾乎就等於是{飲酒}意思.』
但是即種推論，過渡階段个「享受」用法，並無文獻、語料个證明，咱所知个 sui 攏專指啉酒个享受，其他个風流享受，攏無講 sui，但是日語个「粋」偏向嫖樂[phiâu-lo̍k]。而且若正實對日語 すい 來个，台語个聲調應該採用較倚音个第二聲 suí，毋是第一聲 sui。所以即種解說我存疑，目前無採用。
© 潘科元 2014 版權所有．敬請賜教
Comments powered by Disqus.