台語類義詞「畢業、卒業、出業」个呼音變體佮應用

台語「畢業」、「卒業」是日本時代引進西洋个學校制度了後才出現个語詞，以前个台語文獻無。台日大辭典有收即兩个詞，攏注明「國(語)」，表示是對日文來个。

「卒業」確實是日文，但是日文到底有「畢業」無？一寡精通日文个先進來賜教，講日文無用著畢業，按呢扑算是台日典失覺察，應該是台語對民國華語吸收來个。總是，咱會使確定「畢業、卒業」攏毋是閩台語个在來詞。 台灣佇清朝尾个時，就有傳教士來設立現代學校，怹按怎稱呼 graduation/commencement？我愛閣稽考看覓。

台日大辭典所收是按呢：
畢業 pit-gia̍p
畢業生 pit-gia̍p-sing
卒業 tsut-gia̍p：卒業生 tsut-gia̍p-sing、卒業證書 tsut-gia̍p-tsìng-su、卒業式 tsut-gia̍p-sik。

以上个「卒 tsut」「畢 pit」攏真明確是第四聲，一種音爾爾。

到今成百年久，台語「畢業」有幾若款呼音變體：pit-gia̍p、pi̍t-gia̍p、pī-gia̍p，少年儂凡勢會講 pì-gia̍p。

若「卒業」照字讀，當然是 tsut-gia̍p，但是戰後咱聽會著个講法大多數攏講 tshut-gia̍p，有先覺就語源个正音觀點斷定這是「卒業」个縒音，但是也有儂憢疑現時咱真熟耳个 tshut-gia̍p 並毋是「卒業」兩字。

不管是佗一種可能性，我關心个是實用台語文，提出以下个建議：

若慣勢講 tshut-gia̍p 个儂，繼續講無妨，但是寫台文个時，毋通寫做「卒業」，因為「卒」自來只有 tsut 一種音，無應該為著 tshut-gia̍p，閣生出一个唸音。Tshut-gia̍p，咱著寫做「出業」，按呢就會通，說明：

古早雖然無「卒業、出業」，但是有「出學 tshut-o̍h」，「學」唸白話音，佇遮是指「學堂 o̍h-tn̂g」，「出學」就是完成學堂个學業，對學堂出去啦。沿用即種表達法，講 tshut-gia̍p，寫「出業」，意思是完成學業，離開學校，音、字、義 峇拄峇[bā-tú-bā]！

若慣勢講 tsut-gia̍p 个儂，當然就著寫「卒業」。

但是「畢業」至少有三種通行个唸法，這真頭疼，目前猶原攏寫「畢業」就好。「畢」字，個人向望採用个「推薦呼音」是 pit 第四聲。但是也無否定社會大眾各儂慣勢个呼音 pī 抑是 pi̍t。總是，若唸做 pì 就毋好，因為是台語真頇顢个少年儂才會按呢講。

「畢業」，唸 pit-gia̍p 是正音、唸 pī-gia̍p 是俗音、唸 pi̍t-gia̍p 是「半奸忠」个音 :-P

補充：2013-07-17 我換就歷史演化个角度來討論遮个類義詞：〈台語類義詞「出學、卒業、出業、畢業」个歷史演化〉