過年佇厝裡，我提一支礦泉水个空矸仔，去灶跤問阮媽媽欲按怎回收？伊比水槽仔角，講：「sánn囥--遮。」即號話，我自細漢就聽有，但是從來無好好仔去想："sánn" 是啥意思？Tann我有分析台語个能力佮敏感度，小想一下，就恍然大悟：
"sánn" 就是「且 tshiánn」个簡化：tsh- 聲母，對塞擦音變擦音 s-，是一種簡化，因為 s 比 tsh 較好發音，但是猶原保留仝款个發音部位；閣來進一步，-i- 介音 lak 無去，當然也是一種簡化。結果 "tshiánn" 先變 siánn，後來閣變 "sánn" 个音。（阮遐無 tshánn 个講法）
佇遮所用个「且」，無論是 tshiánn / siánn / sánn 攏有儂講，tshiánn 个講法佇文獻定定看會著，毋過阮遐已經少儂講，扑算是因為 tshiánn 个音佮「請 tshiánn」仝款，意思較僫分。
所以阮媽媽講「sánn囥--遮」，意思就是叫我「暫且[tsiām-tshiánn] 囥--遮」（「暫且」只是解說用語，毋是講 "sánn" 是「暫且」个合音）。「囥」唸本調，「遮」唸輕聲，是強調「囥」落來个動作，毋是強調「遮」即个所在。因為我閣提矸仔佇手裡，毋知欲按怎，伊愛我先囥咧就是，囥佗位無遐要緊，伊到時就會抾規下，提予糞埽車回收。
有友志認為「siánn囥咧」个siánn，是「先且 sing-tshiánn」个合音，按呢說[sueh]也會通，總是，一旦按呢解說，仝款嘛通講是「且先 tshiánn-sing」个合音。
許嘉勇老師講：「“慢且〇--个”，阮母--也攏講做“ban7-siann2-〇--e0”。」印證我个講法成立，免的確著愛牽對「先且」个合音去。
另外，福建漳州朋友也講，怹海澄腔有講「且慢[sánn-bān]」。欲留儂客閣坐，有講「且[sánn]坐一下 tsiah去。」
「且囥咧」另外一種講法是「小[sió]囥咧」，無仝詞素。
台語「且」个用法不止豐富，親像出名諺語：「生--个且一邊，養--个功能較大天。」[sinn--ê tshiánn tsi̍t-pinn, iúnn--ê kong-lô khah tuā thinn] 有袂少儂將其中个「且」，當做是「請」，意思變做袂輸是華語〔請他到一邊兒涼快去〕迄種酸話。遮閣較妥當个解說應該是「且一邊」，意思是「暫且囥一邊、暫且不論」。即句俗語，其中包含一个話意，勸儂毋通為著要緊欲去揣認親生父母，煞來忽視養父養母个功勞，予怹艱苦心。
台日典有單獨收「且一邊」當做三字詞（但是無收「請一邊」），伊佇即个詞條下跤个例句是：「提無利息且一邊，連母銀suà討無。」就即句話來論，咱看會出來，只有解說做「且一邊」才會通，「請一邊」袂通。
Comments powered by Disqus.