台語「儂名+稱謂」个詞語結構，欲按怎變調？這除了考慮詞構，也愛考慮音節數，音節數是一種韻律現象，佮詞構个語法現象無仝，但是閣有複雜个相互作用。因為情形真複雜，以下舉寡例講一个大套[tāi-thò]。
一、「單音節个儂名 + 單音節个稱謂」：
這有兩種做法：
（一）一種是前音節唸本調，後音節唸輕聲。像「王--哥 Ông--ko」、「柳--哥 Liú--ko」，這用佇對平輩朋友客氣个稱呼，有時對方其實比咱較少歲。
「兄」--字嘛有即種輕聲唸法，像「慶--兄 Khìng--hiann」、「福--兄 Hok--hiann」，但是當今足罕得聽著矣，較捷用个是「兩音節儂名 + 單音節稱謂」，照普通个多字詞變調法，也就是頭前个字攏唸變調，只有尾字保持本調个方式去唸（以下叫做「普通變調式」）。除了「兄、哥」以外，「弟、姊、妹」敢哪攏無即種用法。
女性个稱謂「氏 sī」愛唸低調輕聲，像「林--氏 Lîm--sī」、「阮--氏 Ńg--sī」，這現代台灣儂已經廢無，但是越南女性閣有咧用，1990年代中期以來，台灣真濟儂𤆬越南新娘，所以即个舊話逐家愛閣抾轉來學講才好。
（二）一種是前音節唸變調，後音節唸本調，也就是唸普通變調式。像「壽伯 Siū-peh」、「順叔 Sūn-tsik」，這往往有加一个詞尾「--á」，像「壽伯--á」、「順叔--á」，即號詞尾是單音節稱謂个附屬結構，毋是獨立个，所以也做伙歸類佇遮。
二、「多音節个儂名 + 單音節个稱謂」：這就愛唸普通變調式。
像「科元兄 Kho-guân hiann」、「秀枝姐 Siù-ki tsé/tsí」，頭前兩字攏愛變調，「元」「枝」袂使得唸本調，若無，佇韻律上會足礙虐，完全袂自然。
像「大--个 tuā--ê」、「先/仙--个 sian--ê」即種稱謂也屬佇本類，可比像「秋榮大--个 Tshiu-îng tuā--ê」、「簡秋榮先--个 Kán Tshiu-îng sian--ê」，儂名尾字「榮」著唸變調才好，佇遮「--ê」也是像第一大點个第（二）小點所提起个附屬詞尾結構，所以無將伊算做獨立音節。
三、「姓 + 兩音節个稱謂」：
「姓 + 先生」个情形，「姓」唸本調，「先生」兩字唸低調輕聲，像「李--先生 Lí--sian-sinn / --sian-senn / --sin-senn」，而且「先生」時常會縮音，猶原唸低調輕聲，像「李--sènn--ènn」、「李--sènn」（前一種發音簡化，但是猶原有兩音節；後一者進一步合做一音節）。
但是「姓 + 小姐」、「姓 + 女士」攏用普通變調式。這可能是因為「先生」个稱謂自古就有，古早儂較講究，用輕聲來唸，但是「姓 + 小姐」「姓 + 女士」是近代新用法，近代儂台語規則較簡化，就無用輕聲。（「小姐」是古早就有个詞，但是「姓 + 小姐」个稱呼法，近代才有）。
四、「兩音節个儂名 + 兩音節个稱謂」：
這有兩種做法，有儂佮意用普通變調式（只有稱謂个尾音節唸本調，按呢只有一个「變調組」）；有儂佮意除了稱謂尾字唸本調，佇儂名个尾字嘛唸本調（按呢有兩个音節是本調，就是分做兩个「變調組」）。
像「科元老師 Kho-guân lāu-su」，有儂前三字「科、元、老」攏變調，尾字「師」才唸本調；有儂第一、三字「科、老」變調，第二、四字「元、師」本調。兩種只差佇第二字有變調抑是無變。
即種結構个稱呼，若是講話者叫久、捷講个熟名，就容易用普通變調式；若是較生疏，拄開始咧叫个名，就容易分做兩个變調組。生、熟个因素其實對台語變調有影響，毋是單純看語詞結構來判斷。
五、「三音節个姓名 + 兩音節个稱謂」：
佮第三點仝款，有儂佮意用普通變調式，有儂佮意佇姓名尾字嘛唸本調，拆做兩个變調組。
即種結構較捷用佇正式紹介、演講个場合。無像頂面第二大點較捷用佇個人當面稱呼。
假使讀者貴君个序大儂咧講即種結構是用普通變調式，這就是恁个爸母話，小弟完全尊重。但是汝若無把握，欲問我个意見，我是建議姓名个尾字唸本調較妥當。
因為一旦變調，有時就分袂清楚本調是第幾聲：漳腔第一、五聲變調了後，仝款變做中平調；泉腔第五、七聲變調了後，仝款變做低平調。
舉例像「張秀芬小姐」佮「張秀雲小姐」，若採用普通變調式，佇儂名尾字也唸變調，按呢聽眾就毋知到底伊是「張秀芬」抑是「張秀雲」，因為「芬、雲」變調了後就完全仝音。
所以，建議著唸「Tiunn Siù-hun# sió-tsiá#」佮「Tiunn Siù-hûn# sió-tsiá#」，將「芬」、「雲」个本調唸予明，這也是阮細漢个時聽著大儂个講法。
這佮第二大點个規則，若完全用詞語結構來看，就有矛盾，但是若將音節數个韻律因素考慮在內，就是兩種無仝个情形。
超過四音節个複合多重結構詞，頭前字攏總唸變調，連連做一大捾，聽著顛倒較艱苦。
以上簡單講一下，有無寫著，但是對逆[tuì-ke̍h]个例諒必真濟，請包涵、指正。
以前我有寫過幾篇仔相關个討論，攏是無完整个意見。
Comments powered by Disqus.