去屏東縣里港國小講[káng]台語正音个主題，我提起台語【入字頭】，像【日、字、二】古早是 j 聲母：【ji̍t、jī、jī】，但是多數泉腔早就變 l 聲母，佮【柳字頭】个字混合（所以二[jī]、利[lī]變仝音字 lī），漳泉濫个台南腔嘛變按呢。若是一部份个偏漳腔就有變 g 聲母个現象（限定 j + i 母音个時變 gi；若是 j + u，就袂變 gu）。
我是主張愛尊重即種腔口个差異，但是也愛兼顧系統个一致性，訓練學生个時，建議 ji̍t / jī / jī，抑是 li̍t / lī / lī、抑是 gi̍t / gī / gī 即三種選一套來教，毋通【日】講 li̍t、【字】講 jī、【二】講 gī 按呢濫來濫去。
補充：有个腔口，j + i 个字變 gi；但是 j + u 个字就變 lu，袂變 gu。這是有條件个分化，無算做失系統。我頂段主張兼顧系統一致性，意思毋是欲叫即種腔个儂，「統一」做 gi 佮 gu，按呢毋著。若是虛詞「偌」有 juā、luā、guā 三種變體，算是特例，即三種講法，採用佗一種，攏算著，但是毋通佇一篇朗讀文內底，一時仔讀 juā，一時仔讀 guā 按呢變來變去。（即个詞素可能是合音詞）
有先進提起，有台語評審要求【日、字、二】遮个字一定愛唸 j 聲母才著，唸 l 愛扣分。
我徛佇全國賽个立場，回答講，即種恐驚是【不懂 put-tóng】个評審，儂布袋戲大師李天祿、許王攏無 j 聲母，咱煞認定怹迄種台語毋著，按呢咁著？
毋過若是地區賽个立場，像佇咱屏東縣訓練選手，上好毋通教學生唸 li̍t / lī / lī，雖然屏東地區有真濟少年儂已經攏變 li，但是咱个鄉親父老抑是以 ji 為主，也有袂少儂是 gi，但是若聽著囡仔講 li，怹聽起來會感覺臭奶呆臭奶呆，所以咱上好毋通教屏東學生講【日頭 li̍t-thâu、寫字 siá-lī、第二 tē-lī】即種音。
但是屏東腔有幾字仔 ju 个常用字變 lu，像「愈 lú」、「潤[lūn]--去」（餅無封予好，會潤--去），這毋免硬改做 jú、jūn。
傳承母語、復興台語，愛考慮个因素不止複雜，毋是像【國語】按呢，定一个唯一標準，透過國家機器、教育體制，叫儂儂攏愛遵守，結局就是干焦佇比賽場合聽會著迄款標準國語，而且聽甲予汝起雞母皮，但是生活上無儂按呢講，連電視新聞主播嘛袂「咬」到迄種程度。佇生活上硬學迄種標準，就變成【炳忠哥國語】。
Comments powered by Disqus.