有問題个台語教育：劉福助唱〈宜蘭腔〉

台語優勢腔是漳泉濫（Tsiang-Tsuân-lām），一部份取漳腔、一部份取泉腔，大趨勢就是簡化，親像泉腔白話音 ng 韻母个字，漳腔有分做 ng / uinn 兩韻，台語普通腔就採用較簡單學个泉腔講法。

致使台灣西部本來是漳腔个所在，像桃園、台中山線，嘛攏學泉腔改講 ng。只有去宜蘭，才會佇菜市仔聽著儂講「食飯 [tsia̍h-puīnn]、滷卵 [lóo-nuī]、酸酸 [suinn-suinn]、軟軟 [nuí-nuí]。

例字：

一、「光、扛」：白話音泉腔攏是 kng，漳腔分唸 kuinn、kng。

二、「酸、桑、喪」：白話音泉腔攏是 sng，漳腔「酸」講 suinn、「桑、喪」講 sng。

三、「斷、丈」：白話音泉腔攏是 tn̄g，漳腔分唸 tuīnn、tn̄g。

四、「穿、倉」：白話音泉腔攏是 tshng，漳腔分唸 tshuinn、tshng。

參考我个舊網誌，盡量將所有 ng / uinn 个泉、漳對應攏列出來： 台語白話音泉腔 ng 對應漳腔（宜蘭腔） uinn 个腔口差別 。

以前劉福助有唱一條「宜蘭腔」个歌，內底將所有个泉腔白話音 ng 韻母攏改做 uinn，當做是宜蘭腔，就台語教育个立場來看，按呢袂用--得。以下列出伊个歌詞內底，泉、漳確實有分个字：

黃 n̂g / uînn、軟 nńg / nuí、阮 ńg / uínn、園 hn̂g / huînn、飯 pn̄g / puīnn、熥 thn̄g / thuīnn、算 sǹg / suìnn、酸 sng / suinn、卵 nn̄g / nuī、管 kńg / kuínn、頓 tǹg / tuìnn、光 kng / kuinn、轉 tńg / tuínn（進一步變 tún）、遠 hn̄g / huīnn、問 mn̄g / muī、昏 hng / huinn、方 Png / Puinn、捲 kńg / kuínn、䘼 ńg / uínn、穿 tshng / tshuinn、吮 tshńg / tshuínn。

以下列出伊歌詞內底，事實白話音無分泉、漳腔，攏是 ng 韻母，但是伊硬換做 uinn 韻母，來當做宜蘭腔，按呢毋著：

堂 tn̂g、腸 tn̂g、湯 thng、庄 tsng、央 ng、囥 khǹg、長 tn̂g、床 tshn̂g、鋼 kǹg。