台語「刀路深」是啥意思？

頂日仔我佇面冊(Facebook)有出一題予逐家討論，問講「做衫个阿麗=仔刀路真深」是啥意思，看起來意見真濟款。即句話是阮厝邊佮家母對話个時出現个，後來我有問家母確認兩擺，是指迄个裁縫做衫工錢提真貴。

這佇廈英典補編(1923)、台日大辭典(1931-2) 攏有誌載[tsì-tsài]，通講是普遍tik个台語，毋是地方腔。（廈英典編者巴克禮牧師主要佇台南活動，台日典主編小川尚義是佇台北。）

「刀路」有兩種意思，看前後配搭个字眼來決定。

「刀路」一个意思是用刀个手路、刀技个意思。台日典解說做「肉、菜个切法」，例句「刀路好」。廈英典補編有一个可怕个例句： "khah hó to-lōo"（較好刀路），講是刣頭犯對刀斧手[to-póo-tshiú]（劊子手 kuè/kuì-tsú-siú）所講，拜託行刑个時予伊較快活死个話："said by criminal to executioner, asking for speedy death." 古早即種代誌，kōo喙姑情無效，眷屬定著愛開錢去巴結劊子手。

「刀路」閣一个意思是著特別配搭形容詞「深」來用，若講醫生、師傅儂（包括裁縫）刀路深、刀路真深、刀路傷深等等，毋是咧講怹个醫術、工夫好䆀，是暗喻講怹收費真懸、工資真貴。

無論台日典抑是廈英典補編攏有收著「刀路深」，台日典是解說講「醫生、辯護士（律師）等要求真懸个費用」，廈英典補編解說講 "making high charges, esp. of doctors."

不而過，「刀路深」佇廈英典補編閣收另外一種解說 "a great schemer; a dangerous man"（大陰謀者、危險人物）。

（2020-10-17發表佇Facebook）