台語「卸世卸眾」（華語〔丟人現眼〕）

華語〔丟人現眼〕，台語講 sià-sì-sià-tsìng，即个詞正確个漢字是「卸世卸眾」。

這是台語三字詞「卸世眾 sià-sì-tsìng」，重覆動詞「卸」--字，變成四字成語的構詞法，口氣比三字--个愈強。

「卸」佇遮的講法，親像北京話〔丟臉〕的〔丟〕迄種引申个意思。佇「世眾」也著是「世間个眾儂」[sè-kan ê tsìng-lâng] 頭前「卸面子 sià-bīn-tsú」，叫做「卸世眾」、「卸世卸眾」。

「世」讀音 sè，親像「世界 sè-kài」；語音 sì，親像「後世儂、即世儂」个「世 sì」。「眾」讀音 tsiòng，像「民眾 bîn-tsiòng」；語音 tsìng，像「眾儂 tsìng-lâng」、「眾百姓 tsìng-peh-sènn」。「卸世眾」是口語白話詞，所以用語音。有學者認為是「卸四眾」，「四眾」表示「四方个眾儂」。即種講法，是無全面來考慮相關个台語詞，單獨掠 "sià-sì-tsìng" 个音來猜測个結果。因為台語嘛有講 "sià-sì-tsiūnn"，"sì-tsiūnn" 就是「世上」个白話音，寫做「四上」袂通。有 "sià-sì-tsìng"，嘛有 "sià-sì-tsiūnn"，即个 "sì" 愛統一用「世」个白話音，一貫來解說才好。「卸世上」就是「佇世間上 làu-khuì-làu-tak」，sià-sì-tsiūnn 即種講法，目今少儂知。

毋但按呢，閩、台古早俗語有一句：「有樣看樣，無樣看世上」[ū iūnn khuànn-iūnn, bô iūnn khuànn sì-tsiūnn]，遮嘛有用著「世上 sì-tsiūnn」个詞。即句話，意思是講，卡早个𠢕儂若有處理過仝款个代誌，咱就看伊个樣、趁[thàn]伊个樣；若是無前例thang趁樣，咱就看世間上一般儂个心理反應，來想看按怎做卡袂予儂議論。現代台灣儂台語退化，干焦會曉講「有樣看樣，無樣家治想」。

「卸世卸眾」前三字攏是第三聲（尾字嘛是第四聲），前三字變第二聲高降調。因為連紲[suà]三个高降調，講tio̍h卡食力，所以真濟儂慣勢第二字無降落去，唸高平調，卡輕鬆，變做 sià-sí-sià-tsìng，有儂煞誤會第二字是「死」--字，毋著。若是三字个講法，就有維持卡正確个變調 sià31-sì31-tsìng11，袂講 sià31-sí33-tsìng11。