真濟儂不准阮稱呼家己个語言是台語，怹个理由是：原住民、客家人[hag2 ga24 ngin11] 嘛有權利稱呼家己个語言是台語，是按怎恁有權獨佔即个名稱？
阮嘛歡迎原住民、客儂稱呼家己个話是台語。問題是，怹根本無愛按呢做，怹有怹家己本底个名稱，怹佮意繼續用，阮當然尊重。
按呢反對个儂是咧反對啥？其實怹就是完全無容允「台語」即个名稱存在，希望「消滅『台語』」，才夯[giâ]出原住民話、客話來做借口爾爾。
恁無論行到佗位，都以「客」為榮；阮無論行到佗位，都以「台」為榮。請互相尊重，恁若不准阮閣號做台語，阮嘛不准恁閣號做客語，因為恁嘛是台灣个「主」在內，是按怎欲一直叫做「客」？
一个地區上大个語族，歡喜用即个地區名來稱呼家己个話，哪有毋著？這毋是排斥其他語族，只是表示對即个地區个認同。
話講倒轉，若是認為「台語儂才是台灣儂」按呢个觀念確實毋著，「台灣儂」有袂少「非台語儂」。有真濟儂將「台灣儂」當做是「客家儂」、「原住民」个相對名詞，按呢也毋著。
若是因為台灣閣有客儂、原住民，所以阮个話就無權號做「台語」，按呢，阮个話嘛袂使號做「閩南語」，因為閩南仝款有客家儂佮南方原住民畲族。
即篇佇面冊貼出來，有先進回應寫講：
〔平劇在台灣被某些人稱為國劇，遭到質疑，挺國劇人士就跳出來說話，意思是歌仔戲、布袋戲、皮影戲都可以說自己是國劇呀。可是，你說你是國劇藝人的時候，誰會認為你是演布袋戲或歌仔戲藝人呢?不知這個問題和台語問題有沒有雷同?〕
我个答覆：
欲選一項來做一國、一地代表性个稱呼，有兩種情形，一種是客觀上佔多數，一種是官方認定。台語是客觀上佔絕大多數，所以才約定俗成；「國劇」是官方、統治者指定，伊講是就是，其實佇社會个從業佮欣賞人口真少數。
「國〇」著愛國家明文公告認定，毋是人民講是就是。若是教育部公告，認定歌仔戲、布袋戲是「國劇」在內，而且予怹仝款个地位佮資源，社會自然就會改變觀感。
當然，按呢國劇變做集合名詞，欲閣進一步分別其中無仝个戲種，猶原需要加上無仝个名稱。
語言个情形，目前中華民國个國語只有唯一个北京華語，客家朋友應該做个是爭取客語升做國語个地位，毋是佮台語儂相爭「台語」个名。當然，客語若成[tsiânn]做國語，台語嘛愛成做國語，世界先進國家，一國有幾若種國語是四常个代誌。
若是客家族、原住民族真正歡喜稱呼家己个語言是「台語」，咱才有需要進一步討論，欲按怎分別台語即个集合名詞內底个無仝語言。但是事實是，客家鄉親、原住民鄉親普遍無愛，怹一心想欲守護怹傳統个名稱，所以即種假設性个問題就無啥意義。
而且請注意，當今个現實是，客委會一年有幾十億个經費好開，台語儂無委員會，全然無獨立个經費，只有教育部下底小單位一寡零星錢。台語即个語族所遭受个歧視極大，煞閣予儂講是福佬沙文主義。
若是客語、台語、原住民各族語攏升做「國家語言」个地位，欲按怎佇「國語」內底做分別？真簡單，將原來獨享「國語」地位个「華語」恢復「華語」正名（即个名社會也漸漸採用矣），其他个台語、客語、原住民各族語攏保持各語族家己本來佮意个稱呼就好啦。客語已經是國家級个語言矣，閣咧佮台語相爭台語个名是欲創啥siô？ :p
蔡英文佇競選个時，也親喙向客家鄉親保證，伊欲將客家話升做國家語言，咱才看伊按呢守信用。
Comments powered by Disqus.