台語「裾 ki」

台語「裾 ki」，華語〔（衣服的）下擺〕。

衫仔裾[sann-á-ki] 有幾若款設計，前後有做「齊裾 tsê-ki」抑是「圓裾 înn-ki」，雙爿會使「開裾 khui-ki」。

裙裾[kûn-ki]，華語〔裙擺〕。俗語：「即个囡仔是我裙裾交落[ka-la̍uh]--个」，意思是我親腹所生，是親生囝；毋是共儂分[pun]个，毋是契囝。

閣有一句俗語：「馬褂 khiú甲無內裾」，是比喻講受儂過頭熱情个邀請。但是我無把握字面上个意思，咁是一種耍笑話？親像另外一句俗語「䘥仔 khiú甲無手䘼[ńg]」，䘥仔就是〔背心〕，當然無手䘼，但是毋知馬褂到底有內裾無？

補充：感謝徐福全教授來賜教（4/14），伊提供一句俗語：「汝个衫仔裾借我giú」，是顧謙个話，意思是望汝予我倚靠，我才會得寸進。