正音个問題不止仔複雜，干焦考慮中古韻書个反切是無夠个。「淑」雖然有《唐韻》「殊六切，音孰」个記載，予咱知影伊有陽入聲个古音，但是自兩百年前个泉腔韻書《彙音妙悟》就將「淑」歸佇陰入聲，也就是本調唸 siok4，所以「淑女」佇前字才會變高短調，這有照「變調規則」變調，所以袂使講「無照規矩變」，只是會使講「單字本調走音去，對陽入縒對陰入」。
但是閩、台語將「淑」唸陰入，咁真正是走音？這有兩種可能，第一種是確實走音去矣（嘛走音兩百年以上矣），伊走音个原因，可能是「有邊讀邊」，將「淑」當做佮「叔」文音仝音仝調 siok。第二種个可能是，因為古文「淑」佮「俶」定定通用，「俶」是陰入聲，才將「淑」也唸陰入聲，所以袂用得講「淑」本調陰入一定毋著。
另外像「印象」「高尚」个「象、尚」，咱聽社會普遍唸做 sióng，這是複雜个漳泉濫个結果，泉腔即兩字是陽上聲（全濁聲母个上聲字，泉腔並無歸入陽去），泉腔个陽上佮陰上照講本調調值無仝，但是有个泉腔，像新竹迄種同安腔，怹一方面採用台灣優勢腔个七調類系統，上聲本調只賰一種調值，但是一方面猶原保留「象、尚」歸佇上聲个分類，所以才會唸陰上聲个高降調，而且影響到全台灣，佇即兩字無照漳、廈腔个陽去聲來唸。這佇清朝出世个新竹儂鄭蕊珠女士，伊跟隨唐山來个漢文先生讀古文个時，就是按呢傳承个。可見這有相當个來歷。
論到「無照規矩變」，像即馬个儂，「放假」个「假」本調唸高降調，但是「假日、假期」佇變調位置个「假」嘛唸高降調，這才是無照規矩。
即種無照規矩，是雙重因素造成个，第一重，台語儂佇頂一代就普遍毋知影「假」有陰去聲 kà、上聲 ká 兩種勾破文音，攏一律唸 ká，但是到新一代个台語儂，一方面「放假」是綴老一輩來唸 ká，一方面又閣受華語影響，無意識中進行「調類對應」，煞佇「假日」个所在，將「假」唸做勾破陰去聲，變調當然就變高降調，致使「放假、假日」兩个「假」攏是高降調，產生「例外」。
大部份个「例外」，攏是有道理會凍分析个，毋是一味講伊錯就會得牽挽過來个。
頭前討論个「淑」，咱若單字、本調是唸陰入 siok4，而且變調是變高短調，按呢毋是叫做「無照規則、例外」，應該是叫做「佮古音个調類歸類有出入」。但是就台語發音系統來講，猶原保持伊本身个本調佮變調該有个規則一致性。「涅槃」个「涅 liap4」嘛是。
「汐止」有儂唸 sit8-tsí，有唸 sik8-tsí，前字變調攏是變低短調，按呢「反推本調」，咱就知影怹是將「汐」當做本調陽入聲个字，這有符合古音調類，並無毋著。
「態度」前字「態」變調若唸低調，「變態」後字「態」若又閣唸低調，這就是失系統，毋好。
閣像「院長、病院」个「院」有出現另外一種失系統个現象（第一字「院」變調變高降調，反推本調應該是第三聲，但是第二个「院」本調是唸第七聲，兩个無對tâng），但是這有漳泉濫个歷史音變个因素牽涉在內，佇無受華語影響个老輩儂早就出現，毋是像一寡儂所想个，是新一代台語儂予北京華語帶衰个結果。
附記：即篇原底是佇 Facebook 回應儂个文字，所以感覺無頭無尾。
(Facebook )
Comments powered by Disqus.