台語「運動」个意思

「運動」佇台語至少有兩種意思，一種佮華語仝款，指體育運動；一種是指「競選[kīng-suán]、助選」。

「運動員」嘛是兩種意思，其中一種是「助選員 tsōo-suán-uân」。親像最近接著真濟電話來鼓舞講愛，愛頓[tǹg]予某儂，有个是用電話錄音个，無誠意；有个是運動員敲[khà]來个，卡親切。

台灣俗語「第一戇，…；第二戇，…」版本真濟。

一種是「第一戇，選舉運動；第二戇，撞球相撞；第三戇，食薰歕風」。

閣一種是「第一戇，替儂選舉做運動；第二戇，種甘蔗予會社磅」。

若干焦「選舉運動」，「運動」个意思卡無明顯；若講「替儂選舉做運動」，按呢「運動」个意思就卡明瞭－－「選舉運動」無一定是家治出來選，替儂助選嘛包括在內。有儂會笑講，替儂助選个，比家治出來選个閣卡戇！

「運動」閣一个意思，是卡具體个「運行」，親像「氣血運動 khì-hiat ūn-tōng」。