李遠哲講台語為蔡英文徛台運動

昨昏暗，李遠哲第一擺親身出現佇競選場，佇台中為蔡英文徛台助講。

我去東海附近个樂器店，欲轉來河南路參加暗會，半路毋知按怎，敢[kánn]是去予魔神仔牽去，一直騎到南屯水碓仔[Tsuí-tuì-á]才致覺著已經失路，趕緊閣踅翻頭。到位个時，已經袂赴聽著李遠哲个演講。佳哉真濟朋友轉來攏有分享影片，伊用台語演講，但是有濫一寡華語。

李遠哲是新竹儂，伊講个台語是新竹腔（類似中部海口腔，但是有出入）。伊細漢个時是受日本教育，讀日本子弟卡濟个小學，怹厝內嘛是「國語家庭」（國語是指日語），佮咱現今失落母語个一代煞攏仝款。後來國民黨接收台灣，伊轉學去台灣囡仔咧讀个小學，因為袂曉講台語，煞予同學欺負。伊後來去美國做研究，幾十年了後才轉來定居。

伊迄沿个台灣儂（包括卡老个李登輝），有留學日本、歐美受高等教育个少數儂，台語程度就不如一般老百姓，講了無夠輾轉、自然。到今[tann]儂儂攏會凍讀大學，結果就是儂儂台語攏袂輾轉，台語文化也衰亡甲真僫挽救矣。