台語：霆水螺（華語〔鳴汽笛、拉警報〕）

圖片是杜謙遜牧師製作个，感謝伊提供我轉貼。圖片中寫「陳水螺」个「陳」是民間慣用个借音字，現時教育部建議寫做「霆」字（字音 tîng），唸白話音 tân，就是「鳴響」个意思，像「霆雷公 tân luî-kong」，比華語〔打雷〕加足心適。「霆水螺 tân tsuí-lê」就是華語〔鳴汽笛〕，「水螺」就是〔汽笛〕。「汽笛」應該是日本儂創造个詞，華語借去用个。

請注意，「水螺」無限定佇「防空警報器」，迄種警報器台灣佇二次大戰才有，但是台語「水螺」老早就用佇各種交通工具个警示發聲器，無論火車、汽車、火船（輪船）攏有。自動車个 "lap-pah"，以早就叫做「水螺 tsuí-lê、車螺 tshia-lê」。「霆水螺」簡單講「霆螺 tân-lê」，嘛有講「pu-lê」，pu（ㄅㄨ）是擬聲[gí-siann]動詞。

上古早个「螺」就是真正个海螺，像法師作法啦、賣豬肉个咧喝賣啦，攏會「歕螺 pûn-lê」。咁毋是有一句文言成語「大吹法螺」？

因為功能相當，古早台語儂將本來是天然物个「螺」，應用來稱呼工業化以後个科技設備，這是值得咱現代台灣儂學習个語言智慧。

林良憲先生、林宗範先生來指教講，台灣司功（道士）所歕个，是用牛角（牛母角特別好歕）、抑是羊角做个，叫做「角鼓 kak-kóo」。相傳是太上李老君所騎个獨角青牛角。

鄭志文先生（恆春兮）指教講：「渦輪增壓器」，台語叫做 lê-á-e-á，採用「單渦輪增壓器」就是「掛一粒 lê-á-e-á」，採用「雙渦輪增壓器」就是「掛兩粒 lê-á-e-á」。