日月催逼儂快老 [ji̍t-gua̍t tshui-pik lâng khuài lāu]
無閒規工誠忝頭 [bô-îng kui-kang tsiânn thiám-thâu]
子時欲過丑時到 [tsú-sî beh kuè thiú-sî kàu]
自嘆頇顢頭勾勾 [tsū-thàn ham-bān thâu kau-kau]
頂面四句連是佇 2016-11-13寫佇面冊個人動態，內底用著「頇顢」（ham-bān / hâm-bān），「頇顢」是教育部用字，結果有海外講福建話个朋友看無。其實即兩字歹寫歹記，逐擺我欲扑字，攏著停落來想一下。
主張台語 ham-bān（也有儂講做 hâm-bān，泉腔分會出來）著愛寫做「頇顢」兩字，是一寡飽學先覺。
連雅堂《台灣語典》：
『漢漫：謂無能者。呼含慢 正音也。「北齊書」「楊愔傳」：愔強識不忘，有魯漢漫者，自言猥獨不見識。愔曰：『卿前騎禿尾驢，見我不下；何不識耶』？又調之曰：『名以定體，漢漫果自不虛』。亦作頇顢。』
但是古文只有「顢頇」（唸做 buân-han），並無「頇顢」（中研院漢籍電子資料庫、中國哲學書電子化計劃攏查無），而且「顢頇」有兩个意思，一个是「大面貌」（面 真大个形），一个是「形容不明事理，糊裡糊塗」，這佮台語 ham-bān 个意思哪有仝款啦？
閣再講「顢」字音是 buân，硬欲牽對口語 bān 个音，嘛傷勉強矣。
教典承[sîn]著古老博[kóo-nóo-phok]个話鬚，硬拗古文用詞，顛倒順序來寫台語个結果，就是創出字體歹認歹記、意思袂通、呼音失真个用字！
咱看教育部台語辭典按怎解說即个台語詞：
『形容人愚笨、遲鈍、笨拙、沒有才能。』
照按呢解說，即个詞直接寫做「憨慢」咁毋是上好勢？「憨 ham」就是「愚笨」，「遲鈍」就會「慢」，「憨」加「慢」就是指笨拙[pūn-tsuat]，無能力、無才能。
教典寫做「頇顢」，而且正文內唯一標音是 hân-bān。其實口語即个詞前字韻尾一般儂攏講 -m，毋是 -n，教典硬鬥一个無干礙个漢字，了後閣望文生音，硬欲改咱口語个呼音，講這是受著後字 b 雙唇聲母發音部位同化才唸走音去个。伊个方音表所收各地个講法，前字也一律記做 hân，無可能！
口語 ham-bān，有儂講 hâm-bān，台日大辭典兩音攏有收，意思是仝款，伊漢字 ham-bān 寫做「憨緩」，hâm-bān 寫做「含緩」，用「憨緩」做主要詞目。「緩」本音 uān，佇遮是做訓用字。請注意，伊按呢兩音攏收，毋是指漳腔型變調个儂前字變中調，泉腔型變調个儂前字變低調，若純然是即種情形，只要寫做 hâm-bān 就兩腔攏通，伊真嚴謹，袂分列兩音，這應該是伊有調查著平平泉腔型變調个儂，有儂講 ham-bān，有儂講 hâm-bān。
教典寫做「頇顢」个理由，到今「臺灣閩南語按呢寫」用字解析專欄，並無提出說明。
我以後欲寫「憨慢」較條直！「憨」字雖然台語字典文言音只收陰平聲 ham，但是中古音韻書即字有收清聲母「曉」、濁聲母「匣」兩音，清聲母个讀法是陰平調呼談切，對應台語是 ham1；濁聲母个讀法是陽去調，下瞰切，對應台語是 hām。
按呢看起來，阮講个是陰平調 ham-bān，有个腔口講个是 hām-bān，寫做「憨慢」攏會通哦！
（即篇本來是2016-11-13發表佇面冊網誌）
Comments powered by Disqus.