教育部臺灣閩南語推薦用字公告了後，引起社會各界袂少个議論，以下凊彩摘[tiah]出三个有爭議个，教育部所推薦个台語漢字詞，先列音標，才列漢字，青色个漢字是公告用字，紅色个漢字是一寡社會人士認定个漢字。
- sàn-tshiah：散赤 vs. 貧赤
- thó-tsè：討債 vs. 奢侈
- tàng-sng：凍霜 vs. 吝嗇
咱完全看會出來，按呢主張个社會人士，怹雖然會曉講台語，但是怹規世儂毋捌看過任何以早个台語文獻，包括十六世紀个南管戲文到幾十年前真時行，台語走唱[tsáu-tshiàng]唸歌个歌仔冊。怹只有受過國民黨教育，只有看過士大夫个文言文，佮北京華語白話文。怹雄雄看著教育部按呢建議台語漢字，將「明明真簡單」个台語，使用「蓋奇怪」个漢字來寫，一時大著驚，大受氣，就透過立委个政治勢力，來對推薦用字委員施加壓力，要求修改。
怹掠叫講漢字是文言文佮北京話文个專利品，慣勢用文言詞佮北京話詞來思考佮理解漢字。怹面對台語本身發展出來个特殊講法，聽是聽有，但是寫做「會凍直接讀出正確台語音个漢字」了後，一下看，接受度顛倒足低，甘願用「訓用詞」來代替，「訓」是「解說」个意思（就是「訓詁學」个「訓」），揣意思差不多个漢字文言詞來寫台語白話詞，唸台語口語音。因為漢字本身卡抽象，欲對應啥乜「音」，敢哪無必然个限制，只要「意思」有通，伊就接受，這就是「訓用」、「訓讀 hùn-tho̍k」，「訓用字」就是「借義字」。
但是無論徛佇學術研究，抑是實際應用个立場來看，即種做法攏真有問題。學術研究立場就是講，對漢字文字史佮漢語聲韻發展史根本無法度稽考[khe-khó]出「吝 līn」即字漢字會使唸做 tàng，「嗇 sik」會使唸做 sng，規个差太濟咧！毋但台語專門个學者無同意即兩字會使按呢唸，我相信對岸全中國所有个漢語音韻學家攏袂同意。
親像 sàn-tshiah 嘛仝款，有儂完全袂凍接受「散赤」，主張愛寫做「貧赤」、甚至「貧窮」。但是「貧窮 pîn-kiông」即兩字，無任何一个漢語聲韻學家會同意講，伊有可能對應到台語 "sàn-tshiah" 个音。語言音韻个演變，有伊非常嚴密个內在規則佮研究方法，毋是用大概、差不多仔準過著好个。
「訓用」，就是干焦提解說起來仝款意思个字詞來代替，方便袂曉講即種話語，但是看有通用漢字个儂來理解意義，但是咱若欲讀出作者心目中想欲表達个台語音，往往會走爭去。徛孤爿[khiā-koo-pîng]滿足大概上意義个溝通，但是完全無法度傳達發音，事實嘛表現袂出意義上幼路个分別。
只對文言文佮北京華語文有素養个現代台語儂，會卡佮意訓用法，這是會凍理解个。但是蓋趣味个一點，即種主張个儂，絕大部份攏毋捌寫過規篇个台語文。過去毋捌，未來恐驚嘛袂去寫。
顛倒遐个只會曉台語，早年个台灣儂，親像歌仔冊个作者，怹卡佮意用借音字。借音字是徛佇另外一爿，只關心發音唸會準，無關心漢字意義有肆配，結果怹創作出來个一大堆台語文獻，現代儂就看甲足食力。
現代台語文研究者、運動者，就是向望取中和[tshú-tiong-hô]，無愛傷[siunn]偏訓用，嘛無愛傷偏表音。怹有定出一寡選字个大原則，但是嘛愛隨條仔去考慮個別个情形，眾儂來推撨[tshui-tshiâu]。總是怹足重視系統性、一致性，希望兼顧台語个主體性、豐富性，一方面閣好學好用。所謂好學好用，毋是攏無用心去學，干焦用北京華語白話文个成見來否定。
親像 sàn-tshiah 寫做「貧窮」，彼是傷偏訓用，因為台語其實足豐富，有 sàn-tshiah / kîng-sàn / kîng-tshiah sàn-hiong / sòng-hiong 甚至嘛有 pîn-kiông 个講法，親像俗語「越奸越巧越貧窮，奸奸巧巧天不容」[ua̍t kan ua̍t khiáu ua̍t pîn-kiông, kan-kan khiáu-khiáu thian put-iông.] 咁講即六種台語類義詞，攏一律寫做「貧窮」兩字來準算？
仝款个道理，台語其實嘛有 tshia-tshí（奢侈）、līn-sik（吝嗇）个講法，袂用得因為現代儂台語程度退化，普遍袂曉即種卡文言个台語詞，就掠準台語袂使按呢講。
若準 sàn-tshiah 用「貧窮」來訓用、thó-tsè 用「奢侈」來訓用、tàng-sng 用「吝嗇」來訓用，按呢其實是犧牲台語个豐富佮精微[tsing-bî]，來屈就文言抑是北京華文，予台語文變成佮「抽象漢文」差毋成物[m̄-tsiânn-mi̍h]个書寫系統，傷害咱欲忠實表現台語特色个本心原意。
sàn-tshiah 寫做「散赤」，是完全合理个。家伙散[suànn]散去，財物袂聚集（台語叫做「袂居財[bē ki-tsâi]」），當然就變貧窮[pîn-kiông]. 「散」--字唸文言音，是因為伊是引申、抽象義，用來佮唸白話音 suànn，表示具體意思个用法做分別，這是台語特別精密个所在。閣講「赤」，文言嘛有「赤貧」，表示散[sàn]甲一無所有；北京白話嘛有「赤條條」表示啥乜衫攏無穿，所以台語講个 sàn-tshiah 當然是寫做「散赤」，音、義完全有合，是本字、正字。
thó-tsè 寫做「討債」嘛是本字，發音完全有合，免講。意思方面，這是佛教个輪迴觀念深入咱个民間了後，所形成个引申表達法，是英語所講个 idiomatic expression （指「無法度照字面意思來理解个慣用語）。儂講「父囝相欠債」，因為頂世儂相欠債，即世儂才會做父囝，出世來共老父「討債」，所以袂惜物、浪費，家伙連鞭予伊敗了了，這就是「討債」个精義。「討債」，重點毋是佇「奢侈 tshia-tshí」，「奢侈」是強調傷過豪華，傷過享受。「討債」是指無惜物、浪費。所以「討債」絕對袂使寫做「奢侈」，毋但音完全無合，意思嘛有出入。
若北京語「討債」，台語愛講「討數 thó-siàu」。
tàng-sng 寫做「凍霜」咁有啥問題？既然漢語通用詞「寒酸」會使引申表示「散赤儂無大方、無tuā-pān」，是按怎「凍霜」袂使引申表示「毋甘提錢出來、小氣」？兩个詞攏是用具體个感受形容詞，引申表示一種抽象个、儂个性格。
「小氣」予儂感覺袂親切，親像「霜」，冷ki-ki，予儂毋敢接近，「小氣」个儂毋甘提物件出來，予儂感覺一箍𠕇[tīng]-khok-khok，像「凍結」起來仝款。文言詞嘛有講「慳吝 kian-līn」，汝看「慳」--字，就是心肝 𠕇khok-khok，咁毋是攏用仝款个暗喻？
除了就文字形式來探討台語文个書寫，嘛愛卡深入來探討台語詞素个解析[kái-sik]佮教學。有合宜、正確个解析，才有完整个傳承。親像 tàng-sng，古早時代，逐家攏佇生活中自然使用台語，只要知影佇啥乜語境[gí-kíng]會使得用 tàng-sng 來形容，按呢就有法度溝通矣。但是佇台語一直流失，囡仔愛越頭重學母語个現代，咱愛有正確个語詞解析，來進行系統化、有效率个教學，可比講，囡仔毋知影啥乜是 tàng-sng，咱按愛怎教？三種可能：
一、直接共囡仔講，tàng-sng 就是華語「小氣」，叫伊硬背起來，免管 tàng 是啥意思，sng 是啥意思，免管是按怎欲講 tàng-sng。
二、共囡仔講，tàng-sng 个 tàng 就是「吝」即字，sng 就是「嗇」即字，tàng-sng 就是漢文「吝嗇」个意思。按呢囡仔將來家治愛閣另外記「吝」字，文言音是 līn，「嗇」字文言音是 sik，才袂佇需要唸「不吝指教」个時，唸做 put-tàng tsí-kàu。
三、共囡仔講，tàng-sng 个 tàng 就是「凝凍 kiân-tàng」迄个「凍」，sng 就是「冷霜霜」个「霜」，是比喻講一个儂个心肝袂輸是kiân-tàng起來，自私、物件毋肯分儂，予儂感覺冷霜霜，袂溫暖。
以上舉一寡「音、義攏有合」个台語漢字來討論，對照「足低路」个訓用法。「訓用」毋是攏總低路，佇一寡所在，實在揣無「音義皆合」个漢字來寫某一个台語詞，甚至欲揣借音字嘛有困難，必要个時可以採用「袂造成困擾」个訓用字。
台語是獨立个語言，毋是別種語言个新婦仔，台語欲寫啥乜漢字，愛徛佇台語做主體，去分析、去稽考、去實際使用，無了解文字學、聲韻學、漢語發展史，嘛無讀過台語文獻个鄉親，請將恁个成見放一邊，咱相招同齊來學習。
相關資料連結：
- 教育部臺灣閩南語推薦用字700字 http://www.edu.tw/files/download/MANDR/700iongji_990915.pdf
- 「臺灣閩南語按呢寫」用字解析 http://twblg.dict.edu.tw/holodict_new/download_5.jsp
Comments powered by Disqus.