「鬥」造字原理是畫兩个儂，一儂徛一爿，提一支箠仔、武器咧相扑，本是爭鬥義，後來發展出配合、合作个意思。
「鬥、鬬」是同源詞，也仝音。因為「鬥」--字 發展出對反（反訓）个意義，古早儂另外創造出寫法複雜个「鬬」來表達「接合、配合」个用法。但是自來一般儂袂慣勢，猶原將兩字當做異體字來通用。
參考段玉裁說文解字注：
『鬭，遇也。韵。凡今人云鬭接者，是遇之理也。周語。穀雒鬭。將毁王宫。謂二水本異道而忽相接合爲一也。古凡鬭接用鬭字。鬥爭用鬥字。俗皆用鬭爲爭競而鬥廢矣。从鬥。斲聲。都豆切。四部。』
「反訓」毋但佇漢語，佇人類各語言个演化也是四常代，實在袂用得講是錯誤。上出名个漢文例就是「乖」--字，眾儂攏看語境來判斷是反面義（乖張、乖戾…），抑是正面義（乖巧、乖順…），並無另創新字。
上好咱著徛佇實用立場，來看攏寫做「鬥」--字，是毋是會造成溝通不良。咱喙裡講出來个音，本來就無分，寫法若無分，著愛看上下文來判斷：
「鬥媠 tàu suí、鬥𠢕走 tàu gâu tsáu」是競爭義；「鬥陣 tàu-tīn、鬥跤手 tàu-kha-tshiú、鬥鬧熱 tàu-lāu-jia̍t」是合作義；「鬥榫 tàu-sún、鬥家私 tàu ke-si」是接合義；「鬥空 tàu-khang」是共同做惡，就參與者來講，是咧合作，就講話者个態度來看，是咧貶責。
若是「鬥伙計 tàu-hué-kì」就有兩種意思，原義是正面个「共同經營」，引申義是負面个「結交情婦」。
以前有候選人个文宣標題：「鬥金牛」，洪惟仁老師看著，提醒候選人講，按呢講，是受華語思考模式誤導，台語儂會想做汝是咧「佮金牛鬥空」。
以上 tàu 个正反各種意義，若是「無分寫」个做法，咱袂接受，寧可訓用「湊」來寫做「湊陣、湊跤手、湊鬧熱…」个正面義，咱愛付出个代價，就是會傷害著「湊」--字佇台語口語本有个正音正義 tshàu：「湊巧 tsháu-khiáu、湊坎 tshàu-khám、湊拄坎 tshàu-tú-khám」（華語「湊巧、碰巧、恰巧」）。
遮个詞已經少儂會曉，咱若閣訓用「湊」來寫 tàu，此去个台語學習者，看著「湊坎」，煞干焦會唸做錯誤个 tàu-khám。
Tàu-tīn 若寫做「逗陣」，迄个「逗」是第七聲 tōo，暫時停留个意思，佮第三聲 tàu 音袂合，意思也完全無通，所以毋好按呢用。
也有學者主張，就「鬥」來表示鬥爭意，就「鬭」來表示「合作、接合」意，因為「鬭」筆畫傷濟，就用異體字「鬪」來寫。
Comments powered by Disqus.