英文 "house" 个意思，台語叫做 tshù，引申意思是 "home"，民間自底就一律寫做「厝」。有一寡博學个台語漢字專家，一向真不滿民間即種用法，怹引經據典，指出「厝」是「安置」，而且往往是咧安置「棺材」，用佇「停柩」，哪會使得提來講一般活儂个house/home？
台語即个 tshù，佇明朝、清朝个泉州話南管文獻就攏寫做「厝」，所以毋是日本儂、抑是蔣家軍來佔台灣，毒心醜化[tshiú-huà]台語，才改做按呢。
民間借漢字來記錄在地語言，往往無咧插[tshap]伊古文本義是按怎。橫直就是「看字唸音、聽音解義」，借音了後个意思佮本義差大碼，嘛無要緊。
請毋通嫌民間百姓毋捌字閣兼無衛生，死活無分。上古以來，漢字「六書」就有「假借 ká-tsià」即个條例，假借了後，一旦約定俗成，伊个意思、用法就佮本義切斷關係，這是經典通則，無啥奇怪。
像「也」上古本義是女性性器官，「且」本義是男性性器官，但是借來做文法虛詞了後，無儂 會無聊甲去聯想伊个本義，若無，一本論語，煞變「A書」！
毋是干焦古早聖人、皇帝才有資格假借漢字啦，漢字早就是全民个漢字，咱台語儂个祖先代代沿用，起碼超過五百年个漢字假借字，咱嘛著尊存[tshûn]。
相片是明朝嘉靖丙寅年(西元1556年) 所刊行个南管戲文《荔鏡記》，早就用「厝」字，來表示 "home"：「東風微微 正是新春景致 憶著在厝 好酒慶賀新年」。
台語本字仙 主張台語 tshù（英語 house）个本字就是「茨」，其實毋免草字頭，「次」字本身就有 house 个意思。
禮記‧檀弓‧上 有寫著：
曾子與客立於門側，其徒趨而出。曾子曰：「爾將何之？」曰：「吾父死，將出哭於巷。」曰：「反，哭於爾次。」曾子北面而吊焉。
台語翻譯：
曾子佮儂客徛佇門邊，伊个門徒對內底欲傱出去，曾子講：「汝欲佗去？」門徒講：「阮老爸過身矣，我欲轉去巷仔口哭。」曾子講：「（緊）轉去，踮恁厝內哭（就好）。」曾子也面向北，悼念門徒个老爸。
【爾次 ní tshù】就是台語「恁厝 lín-tshù」。
康熙字典【次】字个解說幾若个義項，其中三个義項有相關：
又次舍。【周禮·天官】宮正，以時比宮中之官府、次舍之衆寡。【鄭註】次諸吏直宿，若今之部署諸廬者，舍其所居寺。【又】宮伯，授八次八舍之職事。【註】鄭司農云：庶子衞王宮，在內爲次，在外爲舍。
又凡舍皆曰次。【左傳·襄二十六年】師陳焚次。【杜註】次，舍也。焚舍，示必死。
又安行旅之處爲旅次。【易·旅二爻】旅卽次。 又處也。
後世个漢文就無用「次」來當做房舍个通稱，干焦用佇出外旅行暫蹛个所在，像「客次、旅次、途次」。
「次」加草頭，意思自然就是「草厝」，意思比「次」較狹，而且「次」是去聲，「茨」是平聲字，所以「茨」無論是意思抑是聲調攏比「次」離台語 tshù 較遠去矣。設使「次」毋是台語 tshù 个本字，按呢「茨」差愈大碼。
按呢咱台語文 house 个意思以後欲改寫做「次」，無愛寫「厝」？毋免啦！
本字考證佮實用台文是兩回事，一--來「次」字已經負擔傷濟別種意義、用法，台語也有咧用--个像「次序、次第、層次、目次、年次、名次、次子/男/女、次貨、較次[khah-tshù]、……」；二--來，「次」字个音也發生變化，中古音廣韻「七四切」，台語泉腔唸 tshìr，漳、廈腔唸 tshù。但是咱 house 無分漳泉攏講 tshù，所以寫「次」，音已經無合矣。
就台語文个主體立場來看猶是專字專用，寫做「厝」就好，這佇三四百年前个南管戲文就是按呢寫矣。雖然「厝」佇文言文佮華文是別種意思。一个漢字，各語各自表述，互相尊存。
Comments powered by Disqus.