本文
台語 tshìn-tshái，教育部臺灣閩南語常用詞辭典（以下簡稱教台典）寫「凊彩」：
(副) 隨便、不講究、馬馬虎虎。例：我是凊彩講的，你毋通囥佇心肝內。Guá sī tshìn-tshái kóng--ê, lí m̄-thang khǹg tī sim-kuann lāi. (我是隨便說說的，你不要放在心裡。) (近)隨便
(形) 任何、不論怎樣。例：凊彩人攏會曉。Tshìn-tshái lâng lóng ē-hiáu. (任何人都會。)
連橫佇《台灣語典》(1929-33) 卷二寫講：
襯采 為請裁之轉音。謂隨便。
按呢看起來，伊是認為古早講「請裁 tshíng-tshâi」，後來「轉音」也就是庶民百姓毋捌字，講了走音去，才變做 tshìn-tshái，所以用借音字「襯采」表示。
即種講法，是先假定台語是古雅个漢語，了後佇文言用語揣倚音个語詞來鬥个結果。台語當然有古漢語个成分，親像日常話「鼎 tiánn、糜 muê/muâi/bê/bêr」有古漢語、古漢文个源頭，這無問題，無論是就意義上、音韻上个考證，攏完全會通。
但是「隨便、隨意」个口語 tshìn-tshái，語源哪會是「請汝來裁斷、裁決」咧？都[to]毋是佇正式个場合，拄著雙方發生嚴重个爭執、衝突，才著需要一个公親、法官來裁決。而且 tshíng-tshâi 佮 tshìn-tshái 个音，毋是 tshìn-tshái 講做是「轉音」就解說會得過个。
欲發生「音變」著有各種音韻條件，符合歷史音韻學个學理，若「tshíng-tshâi」前字上聲、後字陽平聲个詞，到底是按照啥乜音變原理才會變做前字陰去聲、後字上聲个「tshìn-tshái」咧？略略仔倚音、倚意，就捎[sa]來捒做堆个想法，無法度通過語言學術个嚴格檢驗。所以目前並無一个嚴肅个語言學者，支持「請裁」即種說法（sueh-huat 解說法）佮寫法。
tshìn-tshái 佇台日大辭典（1932） 寫做「凊彩」，現代个教台典佮福建个《閩南方言大詞典》(2006) 也攏按呢寫，但是《閩南話漳腔辭典》寫做「𧭼(言+親)彩」，「𧭼」解說做「應答个話」，我扑算即个字眼傷冷僻，意思也無較倚近，無採用。
按呢閩南話、台灣話所講个 tshìn-tshái（福建也有儂講做 khìn-tshái），是毋是遵照「兩岸共識」寫做「凊彩」就好？這也是會用得啦。不而過，即兩字鬥起來為啥乜會變做「隨意、隨便」个意思？我無看著怹提出較有說服力个開拆。
怹所寫个「彩」字我贊成，「彩」有真濟意思，其中有兩个義項：獎品、機運。即兩種意思自古就有咧用，目前無論華語、台語也攏有用著，像「彩券、頭彩」个「彩」就是拄著好運，得著獎品个意思；「好彩頭」是有好機運才有好彩頭，「無彩」是無好機運、失去好機會、代誌个發展無如意，感覺真可惜。Tshìn-tshái 个 tshái 應該就是機運、機會、機緣个意思。
但是「凊 tshìn」是本來燒燒，了後變冷去个意思，包括物理佮心理兩種情形。物理上，像「凊飯、凊糜」；心理上，像「凊心、凊面、凊頭凊面、凊笑」。按呢是按怎即个「凊」加「彩」就變做「隨便」个意思？因為機運「冷」去矣，所以就無要無緊，凊彩攏好？
按呢解說有較 ih-uat（迂曲之意），我 tann 提出另外一種想法予各位先進參考：稱彩。
「稱」動詞，文言音 tshìng，白話音 tshìn。口語詞 tshìn-tshái 个 tshìn 寫做「稱」佇音韻上無問題。佇訓詁个意義解說上，「稱」有符合、配合了有相應个意思，像「稱意 tshìng-ì」就是「合意」，閣有台語較文雅个成語「名稱其實 bîng# tshìng# kî si̍t#」（台日大辭典有收），相當「名副其實」，也就是「名聲」佮「實質」有配合、有相應。
按呢「稱彩」就會使理解做「配合機運、隨順機緣、隨機、逢機、隨便按怎攏無差，無費心神去考慮計較」。像英語也有講 by chance，迄个 by 雖然詞性是介系詞，但是意義有相通。
寫做「稱彩」个舊文獻真少，歌仔冊《清心歌》(1932，禮樂印刷所）有一葩：
短褲穿着眞好體 三十五歲無若多 面皮照鏡幼掛白 稱彩較水恁娘禮
即个詞佇歌仔冊閣有寫做「凊彩、戥彩、秤彩」，歌仔冊个傳統較愛用借音字，無致意本字个稽考，所以列即个只是做補充材料。
初步个結論：「稱彩」个寫法就是 tshìn-tshái 个「本字」，這現時可能干焦我一儂按呢想，需要閣較濟證據來支持，予伊會得踏上「正字」个地位。目前各位欲寫台語文，照教台典个「推薦用字」寫做「凊彩」就好。
註：台語用著「彩」來表示機運个意思，有幾落个常用詞，參考拙文〈台語詞素 tshái 有「獎品」佮「機運」个意思〉。
面冊網誌留言
林振福
稱心如意的稱單單會發 tshing3 的音爾爾， bue7發 稱仔的 tshi n 3。
潘科元
多謝振福兄賜教。咱確實一時無查著「稱」做「相稱」个意思，有唸白話音 tshìn 个其他詞例，即點會減少「稱彩」个說服力。但是這也無夠額證明理論上「單單會使發 tshing3 的音爾爾， 袂使發 稱仔的 tshin3」，因為 tshìng 佮 tshìn 本質上是先佇文白音層頂面个差異，毋是拄開始就因為意義無仝，才讀無仝音來分辨。
潘科元
閣一種可能性是 tshìng 个韻尾 -ng 受著後字 tshái 个聲母 tsh- 發音部位同化，變做 -n，所以煞親像是白話音 tshìn。但是若正實是按呢，大概也已經有兩百年以上个歷史矣，因為 1838 年出版个 Vocabulary of Hokkeen Dialect（作者 Samuel Dyer）就已經是講 tshìn-tshái 矣。
我才閣致意來揣看有「稱」唸 tshìn 是「相稱」意思个其他詞例--無。
林振福
稱心如意是形容詞，稱仔/稱重是動/名詞
潘科元
「相稱」「名稱其實」个「稱」猶原是動詞，毋是形容詞。
許正輝
客語用「儘採」，佮台語完全無仝。
林文信
秤tshìng通稱，稱其一義有順心之義，採通采，稱采或稱採敢若不止通
朱榮文
我感覺tshin3-tshai2
嘛有烏白來的含意
敢是？
潘科元
阮較少用到烏白來个程度
朱榮文
這個人做事誌（代誌）足tshin3-tshai2
潘科元
「這個人做事誌（代誌）足tshin3-tshai2」佮「這個人做事誌（代誌）烏白來」程度應該有差。
朱榮文
硬予用漢字
確實真費氣
黃益次
請裁是after you的意思，依你的，隨你的，尊重對方的，
請(漢音tshing丶，唐音tshin丶)
輕率，不精的，不精心計較的，便宜行事的，
潘科元
tshìn-tshái 實際用法是家己隨便、隨意，真濟時陣顛倒無「尊重對方」。
林振福
『輕率』之意
吳榮昌
請裁
劉建仁
“伊做儂真凊彩”，毋是痞話，有隨和的意思。
連雅堂的《臺灣語典》毋通盡信。迄陣的條件無今仔好。
潘科元
劉建仁 前輩捌用足濟心力，標記《臺灣語典》詞條个呼音，毋知後來有閣修訂補添--無？感謝。
朱榮文
科元兄、這頓我請 菜、tso你叫免客氣
tshin-tshai你點就好
是你講的喔
我tshin-tshai點
你tshin-tshai食
另日不通嫌我傷tshin-tshai
朱榮文
這、攏是隨和？
劉建仁
幾若十年前的代誌囉。無機會修訂。彼陣印出來的閣有誠濟印毋着的，今仔看起來真見笑。有意思想卜重來，奈何力不從心。近年有儂出一本《臺灣語典考證》，毋過無音韻上的討論。
潘科元
伊冊裡有袂少詞，阮讀無路來，我感覺較重要个代誌，是確定每一條个呼音、意義，閣補添例句，若是本字，寬寬仔稽考就好。
劉建仁
你的意見真好，正確。真濟儂 o1-lo2 《臺灣語典》，將伊奉為圭臬，若無按呢做，會繼續傳播錯誤的知識。
劉建仁
tshin3-tshai2，嘛會使考慮 “靘彩” 即兩字。”靘”(千定切)是青烏色，”彩”是彩色，”靘彩”是講 : 青烏色亦好ˇ，彩色亦好，攏會使，隨便啦。(“靘”佮”彩”攏是色的概念，而且是相對的)。
Comments powered by Disqus.