本文
九十歲 莊拋 老先生（台南佳里儂），素人學賣藥仔儂唸歌詩，主題是勸儂花間[hue-king] （花柳街巷）毋通行，歹囝毋通學。沙鹿公明社區三位鄉親佇莊先生後生怹兜所錄影， 我整理記錄做文字，有加一寡仔註解，讀者若是閣有無了解个所在，請提出來，我閣補充。 影片連結：http://youtu.be/ImIQWKHGmfU
- 列位朋友我總請，先請老輩青年兄，會凍做伙是咱命，小弟唸歌分恁聽。
- 小弟來到咱貴地，拜候列位眾逐家，今日對恁較失禮，也無請薰共泡茶。
- 阮也無攢甲半項，同情阮是出外儂，望咱逐家相疼痛，若欲聽歌著閒工。
- 朋友有閒徛較倚，欲唸笑詼無虛華，老兄弟食甲六十外，罕得聽著即號歌。
- 小弟歌仔捌無深，未唸先講恁通知，恁若聽了有趣味，後擺做伙猶有期。
- 囡仔欲聽著恬靜，大儂來聽較會明，聽[thìng]在聲音若較冗，欲唱三藏去取經。
- 囡仔欲聽毋通烏白走，唸歌毋是行拳頭，眾儂朋友我拜候，欲唸迄號虛華个齣頭。
- 勸咱列位朋友兄，煙花茶界毋通行，煙花查某飄流囝，日時激睏眠伴兄。
- 煙花查某上厲害，勸恁朋友毋通開，開了身體若扑歹，像水潑落塗收袂來。
- 煙花查某毋通夢，真真儂講會害儂，害阮洩精尿袂放，倒落眠床喝救儂。
勸恁虛華毋通想，學跋食穿無好樣，花間所在若欲守，歹物儂講有分張。
（註：第二句，竹林書局歌仔冊《暢大先痛後尾歌》是印《學拔食敕無好樣》， 「拔」是「跋筊」（賭博）、「食」是「食酒、食煙片」、「敕」是「𨑨迌 thit-thô」 頭字个借音字，指𨑨迌做歹囝，特別是開查某。俗語「食跋𨑨，三字全 [Tsia̍h-pua̍h-thit, sann-jī-tsn̂g]」，華語〔吃喝嫖賭，樣樣都來〕。泉腔較捷講單字「𨑨」， 莊先生个南部腔大概無即種用法，所以伊講做「學跋食穿」。）
- 勸恁做歹著改變，𨑨迌兩字免相爭，若去染著花柳病，迄陣才知了戇錢。
- 𨑨迌有分好歹運，相敆[sio-kap]參考遮諸君，欲開著愛款病本，才袂後擺仔無夠分。
- 欲開著款錢預防，保護身體才應當，若無確實無妥當，查某是會食儂倯。
- 無款病本毋通開，毒物犯著綴咱來，雖然犯著一半擺，會著袂著啥儂知。
- 犯著一擺就椆櫃[tiâu-kuī]，按呢伊講有古錐，𨑨迌查某免揀媠，毋通干焦欲做堆。
- 暢來代先疼òo尾，菜瓜摃狗去一橛，錢若開了無塊揣，染著歹物知連回。
- 頭毛試火共[kā]研究，見火袂著便是虯[khiû]，貪色也會促[tshik]歲壽，貪色平安難得求。
- 愛開難得求平安，毒症欲講真濟層，茶館仔查某見儂趁，欲治五毒是為難。
- 朋友毋信[siàn]想看覓，小弟比並予恁知，欲暢狀元若是愛，茶館仔查某較捷開。
（註：「狀元」在此是俚語用法，指嚴重个性病。後面有「中狀元」指染著嚴重个性病。） - 開錢有儂足範[pān]儑[gām]，毋知清氣抑驚儂，親像即款包穩慘，了丁失財守孝男。
- 列位朋友聽我勸，茶館仔毋通濫糝穿[tshng]，身軀若染著歹物[mi̍h]，代先破皮兼流湯。
（註：第三句尾「物」--字照講愛唸泉腔 mn̍gh 才會押韻，但是發音人是麻豆儂，講優勢腔 mi̍h。） - 咧隱[ún]檨仔初起勢，先對朋友恁通知，勸恁歹囝著細膩，檨仔親像 ha̍t té 纏。
（註：「檨仔」本義是華語〔芒果〕，俚語用法是指致著性病，下身腫疼。「隱檨仔」指性病當咧成熟、漸漸嚴重） - 檨仔起先毋知疼，親像牽核[khah-ha̍t]真歹行，毋捌染著毋知影，等到大粒才知驚。
（註：「牽核」淋巴腺腫大。） - 大粒伊才知煩惱，骱邊兩粒熱呵呵[jia̍t-ho-ho]，確實歹囝真無卜[poh]，果然檨仔哪苦桃。
（註：「卜」文音 pok，話音 poh。文言「吉凶未卜 kiat -hiong bī pok」，未來是吉、是凶，袂得通卜卦，就是無法度料想、按想。白話音「無卜[poh]」意思是歹料想、歹按算，引申做有凶險。） - 有儂大粒毋敢講，不時骱邊一直摸，臭物食著現運動，有儂哪醫哪發癀。
（註：「運動」，病毒發作。「發癀」，發炎、腫大。） - 起先有儂全袂曉，毋知啥藥食會消，想欲問儂誠見笑，行路強強擋袂椆。
- 一下大疼一直問，食有青草煉冰糖，一日欲食照三頓，害阮一暗唉甲光。
- 藥仔一儂報一款，也有青草做藥丸，心肝哪想哪毋願，干焦hông笑中狀元。
- 藥仔食著足濟項，食甲內面煞漉膿[lok-lâng]，行路尻川激kháng-kháng，親像大船無掛帆。
（註：「行路尻川激kháng-kháng」，尻川頭用翹翹个姿勢咧行路。） - 藥仔見食無對路，檨仔哪生哪大箍，醫來醫去真艱苦，扑算la̋i予西醫糊。
- 去予西醫共看覓，問四五个講著刣，欲知早早就無愛，明明了丁佮失財。
- 果然失財兼了丁，列位著聽我叮嚀，愛開若染著即症，不時都咧[teh]揣醫生。
- 患者對喙問先生，大射一支偌濟錢，六空六个是十四，若上勉強是十二。（六空六，606 是梅毒特效藥）
- 十二十四幾lā箍，聽著遮貴面反烏，若毋予注真艱苦，千算萬算袂對途。
- 檨仔五毒有在內，一句免講汝嘛知，若生檨仔頭一擺，裂開膿血流出來。
- 歹囝症頭真濟項，勸恁𨑨迌sian毋通，暢尿若欲濫糝放，會染歹物驚死儂。
（註：sian，副詞，千萬、無論如何。）
面冊網誌留言
陳怡如
潘老師有夠厲害，翻譯得好清楚
潘科元
無啦，袂少所在我無明瞭。
蔡惟華
真正佩服老師的行動力，連鞭就共台文翻譯出--來，老師無寫出來的部分，我才閣請教老大人~~感恩老師的翻譯
蔡惟華
老師請問~這是算念歌nih?佮褒歌有啥物無仝?
潘科元
蔡惟華小姐，若是專業个唸歌，是用唱个，而且往往有伴奏，若是素人，真濟是kōo唸个，像即段錄影按呢，唸歌个主題變化真大，起碼有幾十葩个長度。
正褒歌是兩儂對唱，汝一葩、我一葩按呢往復對答，用相褒調，無伴奏，內容有真濟是情歌，因為老成凋零，最近二、三十年去采集个褒歌，多數是一儂獨唱。
蔡惟華
感恩老師的解說
潘科元
Joe, 免細膩，互相學習求進步。
蔡宏明
感謝分享！
蔡惟華
老師真正是台語界一粒一的~~ 這首就是《暢代先疼後尾歌》，有冊，毋過莊先以早蹛麻豆，有淹過大水，煞散失去。以早若賣藥仔的欲來這的庄頭，攏會拍鑼摃鼓，綴咧唸歌詩。伊是聽了閣看冊共內容背起來--的。 我問的結果如下10.煙花查某毋通夢，〇〇儂講會害儂，害阮洩精尿袂放，倒落眠床喝救儂。---真真 。 11.勸恁虛華毋通想，學跋食𨑨[thit]無好樣，花間所在若欲守，歹物儂講有分張。跋食𨑨--跋食穿。 13.𨑨迌有分好歹運，相佮參考遮諸君，欲開著愛款病本，才袂後擺仔無夠分。相佮--相敆23.咧隱[ún]檨仔初起勢，先對朋友恁通知，勸恁歹囝著細膩，檨仔親像〇〇奇。〇〇奇--核-té-tînn～～意思是講親像爸仔囝兩人，囡仔共老爸綴牢牢（拑牢牢）仝款。25. 確實歹囝真無卜[poh]~~ 無卜[poh]--危險
蔡惟華
干焦遮--的問題爾爾~~老師實在有夠厲害
潘科元
蔡惟華小姐，sio-kap 我是寫教育部目前个用字「相佮」，但是寫「相敆」有影較好分辨。
bô-poh 寫「無卜」應該是無問題。「卜」文音 pok，話音 poh。文言「吉凶未卜 kiat -hiong bī pok」，未來是吉、是凶，袂得通卜卦，就是無法度料想、按想。「真無卜[poh]」意思是真歹料想、歹按算，引申做有凶險。現代儂漸漸袂曉即个詞，我捌看過有別份唸歌个記錄者將即个詞掠做是「真無保[pó]」，音義攏有走爭去。
莊先生个腔應該屬台南腔，所以汝講是佇公明社區錄影个，公明社區佇沙鹿 著--無？沙鹿是海口腔，佮莊先生个腔差真濟，所以我才著特別問予真。
Comments powered by Disqus.