最近閣有朋友咧議論蔣渭水名言「同胞須團結、團結真有力」到底按怎唸？有儂主張「團結」著唸 thuân-kat 抑是 thuàn-kat（「結」唸白話音），來佮「有力 ū-la̍t」完美押韻。以下我提供實證，顯明當時个台灣儂，「團結」个「結」唸白話音 kat 个，恐驚非常少，因為我揣著百幾个例，包羅英文、日文、漢字、羅馬字四大類獨立个台語文獻，攏是唸 thuân-kiat，完全無查著 thuân-kat 个唸法。最後閣有1935年个曲盤證明。
一、「團體」佇 1923 年《廈英大辭典補編》(p.252) 有收（伊無收「團結」），是唸做 thoân-thé（台羅thuân-thé），「團」--字本調是第五聲。以下引文，括號漢字是我加个，方便讀者：
thoân-thé（團體）, an association; a party; a union. kiat (siat) thoân-thé（結(設)團體）, to form such an association. liân-ha̍p chi̍t ê thoân-thé（聯合一个團體）, forming together one body.
二、「團體」、「團結」1932年台日大辭典攏有收（下冊p.44、下冊p.443），伊个假名標音改寫做台羅是 thuân-thé、thuân-kiat，而且伊注明語源是「國」（日語）。因為是台語吸收日語來个，所以1873年廈英大辭典無收即兩个對咱當今來講蓋常用个詞，就是合理个現象。
三、白話字教會公報自1885年創刊至1967年，八十三年間个語料，thoân-thé（團體）出現个篇數有 555 篇，上早是佇1909年六--月，上晏是佇1967年十二--月，但是 thoàn-thé 連一篇嘛無。若是 thoân-kiat（團結）伊總共出現 121 篇，上早是佇 1912年三--月，上晏是佇 1963年二--月，但是 thoàn-kiat、thoân-kat、thoàn-kat 个講法連一篇嘛無。
以上三點，完全一致，顯明「團體」只有唸做 thuân-thé、「團結」只有唸做 thuân-kiat。
四、「團體」我知影當今有袂少儂唸做 thuàn-thé，但是我完全查無「團」唸陰去第三聲本調、變調變第二聲个根據，而且我嘛知影真濟老大儂是唸 thuân-thé，毋是 thuàn-thé。
五、葉榮鐘先生〈革命家蔣渭水〉文章有寫：「文協發靭以後出現兩句標語：『同胞須團結，團結眞有力』（力字土音與結字協韻），這是當時最正確有力而且最響亮的口號，也是最新穎的宣傳方法」。伊講有「協韻」，這無必然就是咱所認定个押韻法（介音、韻腹、韻尾攏愛仝款）。若是唐詩个押韻方式 an、ian、uan 有算協韻；at、iat、uat 也攏有算協韻，也就是無管介音有無、抑是開合口，按呢「結」文言音 kiat 佮「力」白話音 la̍t 葉先生講有協韻，我也無意外。咱著看予真，伊是講「力字土音與結字協韻」，按呢咱知影「有力」个「力」確實愛唸「土音」，也就是白話音 la̍t，但是伊無講明「結」字是唸文言音 kiat，抑是土音 kat，若照古詩文个慣例，無論 kiat 抑是 kat 攏佮 la̍t 有「協韻」！
（註：現代台語，韻母 iat 多數儂變音做 et，少數較存古，唸 iet，若是唸 iat 个非常少矣，總是，伊个來源是 iat，所以台羅延續教羅，寫做 iat。）
以下閣進一步論說：
「團結」本是一个日語來个新詞，根本毋是舊詞，無論唸 thuân-kiat / thuân-kat / thuàn-kat 對普羅大眾來講，攏是新詞，攏需要經過相當个推廣過程，怹才會了解。
唸做 thuàn-kat 也無比 thuân-kiat 較好理解，kat 雖然佇音韻系統上，是歸類做白話音，kiat 是歸做文言音，但是有太濟生活常用語，有用著 kiat，親像「結籽 kiat-tsí、結親 kiat-tshin、結婚 kiat-hun、巴結 pa-kiat、結拜 kiat-pài、結死冤 kiat-sí-uan、結果 kiat-kó、結局 kiat-kio̍k、不結 put-kiat……」遮个詞毋捌字个鄉親差不多攏會曉。「結」唸 kiat 對怹來講，一點仔都無生疏。
教會公報有 121 篇寫著 thuân-kiat，即个新詞現拄現已經變甲相當通行，若為著欲佮「有力」完美押韻，刁工變唸做 thuàn-kat，民眾顛倒捎無摠[sa bô tsáng]。
今我閣揣著歌仔冊个三例，「團結」个「結」確定就是唸 kiat。（用著「團結」个歌仔冊文本毋但三例，但是愛揣出現佇句尾个，才有法度判斷韻母。）：
1936年玉珍書店《僥倖錢失得了四集》其中：
三人心肝眞團結
出門加佩有面熱
大某小姨成親切
紙印袂落編恰捷
（頂葩韻跤就是 kiat / jia̍t / tshiat / tsia̍t）
廈門 博文齋書局《十九路軍抗日大戰歌》其中：
官民大家〇團結
加記不通卜決烈
不通卜來分派別
上和下睦免口舌
（頂葩韻跤是 kiat / lia̍t / piat / sia̍t）
竹林書局《白蛇西湖遇許仙歌》其中：
錢塘兮人真團結
閣再一番兮鬧熱
編歌意賜有分捌
尾鰍這鏨做恰捷
（頂葩韻跤是 kiat / jia̍t / piat / tsia̍t）
最後欲指出，有明確个錄音證明：1935年楊肇嘉先生「我的希望」演講曲盤，伊也是唸文言音 thuân-kiat（佮「完結、凍結」个「結」仝音），毋是白話音 kat（「扑死結、目頭結結、面憂面結」个 kat），伊是泉腔，前字第五聲變第三聲。
Comments powered by Disqus.