地動哪咧地動，核能發電是執政黨个既定政策

日本大地動，致使福島核電廠險仔造成人類个大災難。台灣人民上街頭，大聲喝講：【我要孩子，不要核子。】但是國民黨主席馬英九猶原佇中常會指示講：【我愛台灣，我要核安】，閣講欲佮大陸增加核能个合作。伊个心情，草民[tshó-bîn]我完全會凍體會。以下替伊傳達心聲予咱台灣老百姓知影：

『核能是執政黨个既定政策，只要本主席吩咐[huan-hù]落去，叫下跤手儂絕對愛注意安全，按呢毋著好囉。恁遮个百姓勿閣番矣啦！

而且咱祖國核電廠一直咧起，經濟大發展，咱煞毋免有樣看樣？佮怹好好仔合作，順紲將台灣个核廢料[hi̍k-huì-liāu]攏總運送過去蒙古、新疆个大沙漠埋埋咧，清氣tam-tam！國際法規定核廢料袂使載去外國永久隱囥[ún-khǹg]，台灣本底著是中國个一部份，無干礙啦。』

咱知影兩岸已經就即个處理台灣核廢料个合作事項，討論足久囉。狡怪个草民想著俗語講：「是害儂縫，毋是暢空」[Sī hāi-lâng-phāng, m̄ sī thiòng-khang]。小馬哥滿心期待个好空[khang]，台灣儂佮中國百姓毋知著付出偌大个代價來滿足--伊。