媠氣台灣話「臭液 tshàu-sio̍h」(050) 作者：潘科元

媠氣台灣話「臭液 tshàu-sio̍h」(050)

解說：臭液[tshàu-sio̍h]，形容詞，有機物含[kânn]有水分，翕椆咧，閣腐敗去，發出臭味。

文例1：郭大誠老歌「賣魚拄著賣草蓆」，唱講伊賣鹹魚去拄著喑噁--个咧喝賣草蓆，tsháu-tshio̍h 講袂好勢，講做 tshàu-sio̍h，害儂掠叫是賣鹹魚个是咧賣臭液个魚。

（Keh Tāi-sîng lāu-kua "Buē hî tú tio̍h buē tsháu-tshio̍h", tshiùnn kóng i buē kiâm-hî khì tú tio̍h ìnn-ònn--ê leh huah-buē tsháu-tshio̍h, tsháu-tshio̍h kóng buē hó-sè, kóng tsuè tshàu-sio̍h, hāi lâng lia̍h-kiò sī buē kiâm-hî--ê sī leh buē tshàu-sio̍h ê hî.）

文例2：欲去遠足，帶便當，內底毋通囥炊卵，驚仔到中晝會臭液去。

（Beh khì uán-tsiok, tuà piān-tong, lāi-té m̄-thang khǹg tshue-nn̄g, kiann-á kàu tiong-tàu ē tshàu-sio̍h--khì.）

相關詞：臭酸[tshàu-sng]、臭殕[tshàu-phú]、臭䭁[tshàu-tsiat]、漚䭁[àu-tsiat]；臭跤液[tshàu-kha-sio̍h]。

© 潘科元 2013 版權所有