這篇文章本身是台語文，使用教育部台語推薦用字，內容分做四大項。第一、第二大項，是紹介台語讀寫 主要愛學習的台語拼音佮台語漢字。第三大項，是紹介重要的台語字辭典網站。第四大項，是電腦處理台語文的基本軟體（連結去另外一篇）。主要是介紹免費的網路資源，也小可補充說明幾部[phō]重要的紙本資料。
一、台語拼音（教育部台灣羅馬字）：
1. 臺灣閩南語羅馬字拼音教學網 http://tailo.moe.edu.tw
2. 臺灣閩南語羅馬字拼音方案及其發音學習網 http://www.ntcu.edu.tw/tailo/
學會曉教育部這套台灣羅馬字（簡稱「台羅」）了後，上好閣用幾分鐘時間來了解「台羅」佮「教會羅馬字」（簡稱「教羅」）的淡薄仔差別，參考臺灣閩南語羅馬字拼音方案使用手冊，內底有表格對照。
二、台語漢字：
1. 基本資料就是教育部臺灣閩南語推薦用字 700 字：
http://www.edu.tw/FileUpload/3677-15601/Documents/700iongji_990915.pdf
2. 超出 700 字範圍的漢字，就去教育部臺灣閩南語常用詞辭典查，若查無的，直接寫羅馬字就可以。
咱欲學台語文，愛有心理建設：台語足豐富複雜，無可能全部用漢字寫出來；另外有的台語音，雖然有漢字本字，但是傷過罕見罕用、歹寫歹認，不如用羅馬字。現時教育部的台語用字，有袂少是用「替代字」，也就是考證袂出彼个台語音的本字，只好先借用別字來替代。這種字，咱若感覺歹學，攏會使寫羅馬字就好，除非汝欲去參加台語的字音字形比賽，才著死背遐的難字。
教育部這个網路辭典，雖然只收較常用的語詞，也已經真豐富，有真濟人會問著的台語問題，佇遐就揣會著解答。除了針對咱欲查的語詞、發音去搜揣[tshiau-tshuē]以外，伊的選單有「索引瀏覽->分類索引」，入去閣分做「分類詞目索引」、「分類圖片索引」，有閒的時，就揀一類，頭至尾看--一擺。
另外，「索引瀏覽->附錄」內底有「俗諺、百家姓、地名、方言差、外來詞、二十四節氣、親屬關係、人體器官圖」，攏是寶貴的台語文化教材。
閣有「資源下載」，內底包括
〇「臺灣閩南語漢字輸入法」：毋但會使拍出台語漢字，其實也會當拍出台語羅馬字。
〇「臺灣閩南語按呢寫」：是針對推薦用字700字，官方請學者所寫的用字解析，也就是解說講為啥物台語某一个音/義，用字小組會決議欲採用某一字來寫，所考慮的因素佮道理。凡若反對教育部推薦用字寫法的先進，建議攏著先來遮了解一下，毋通攏無聽過用字小組眾學者的說明，煞一味顧講家己的主張，按呢學術無交流，袂進步。
3. 直接的學習範文，就是「全國語文競賽臺灣閩南語朗讀參考資料」http://140.111.34.54/MANDR/minna/first.html
（以上官方網頁幾年前已經撤除，好佳哉熱心的董老師的網誌「夢生的母錄」有當年台語朗讀賽140篇備份）
內面有140篇台語短文，會用得下載文章pdf檔案佮相對的朗讀聲音檔，只要哪看文章、哪聽聲音，讀過一二十篇台語文了後，就有概念，會使開始練寫囉。
三、台語字辭典重要網站：
學會曉「台羅」佮「教羅」，以後就通[thang]自在來利用台語字辭典網站：
1. 教育部臺灣閩南語常用詞辭典，頂面有詳細介紹矣。
2. 台文中文辭典：
是楊允言老師整理上網的，背後有鄭良偉教授、陳憲國先生、邱文錫先生等等真濟台文先進怹所收集的語料。咱欲愛知影一个華語詞所對應的台語講法，若佇頂面教育部彼个網站揣無，thìng好來這个網站揣。
伊收的詞，比教育部辭典加足濟，但是並無進一步的解說，愛靠咱家己判斷選用，揣出一个感覺有合用的台語詞了後，盡量閣去下面所列的台日大辭典網站，查考伊的意義佮用法，才袂用了重耽[tîng-tânn]去。
另外也有一个類似的網站「台華對應綜合大辭典」。
欲愛知影一个華語詞、成語、俗語所對應的台語講法，除了查網路，也有紙本的工具冊，親像吳守禮教授編《國臺對照活用辭典》（遠流出版社2000年），閣有陳憲國、邱文錫兩位先生合編的《新編華台語對照典》（樟樹出版社2002年）。這兩套攏真大部[phō]，編輯體例無仝，請先斟酌掀看覓，有合用才買。
3. 台日大辭典台語譯本網路版：
林俊育長老靠伊一人的綿精[mî-tsinn]所翻譯整理的台日大辭典台語譯本，有非常豐富的台語語詞、解說佮例句。總--是，個人的精力有限，有袂少所在愛閣校正，上好佇詞條的上尾欄遐，點伊所附的連結，去看原文件的圖檔來確定伊的呼音佮意思。
4. 甘字典：
這是舊版的《廈門音新字典》紙本資料上網，解說的文字除了原冊的全羅馬字版，閣有漢羅台文版。《廈門音新字典》是甘為霖牧師佇二十世紀初所編輯的（所以儂才簡稱這本冊「甘字典」），方便予咱查漢字的台語音，這是有史以來佇台灣流通的台語字典 上蓋有銷的兩部[phō]之一，所採用的音系是「廈門音」；另外一部是沈富進先生編《彙音寶鑑》，反映嘉義梅山一帶的台語音系。後段會閣解說。
但是愛注意，伊將漢字的台語音分做「讀冊音」佮「土音」。讀冊音用第一字母大寫來標示，土音用第一字母小寫來表示。讀冊音是指咧讀古早文言文所用的漢字台語字音，土音就是台語白話的講法，這種白話，除了包含現代漢語聲韻學界所講的「白讀」（白話音）以外，也包含「訓讀」，伊攏濫做伙。這是時代學術的限制，咱現代台語人毋通掠叫是彼種訓讀音也是某一个漢字本然就有的音。
可比講「豎」字，伊有列 Sū 佮 khiā 兩音。Sū 第一字母大寫，這是文言文讀冊音；khiā 是土音，這个土音，其實只是「訓讀」，毋是「豎」這字真正會使唸做 khiā，干焦會使講「豎 Sū」的「解說」是 khiā。咱這馬欲寫台語 khiā，是用本字「徛」--字。
若是按呢，咱欲按怎來判斷伊所收的「土音」內底，啥物是真正的「白話音」，啥物只是解說性的「訓讀」？就台語學習者的立場，咱學會曉羅馬字了後，通[thang]去買鄭良偉教授的冊《從國語看台語的發音》來讀（1998 年，台灣學生書局出版）。這本冊當年我憑頭仔斟酌讀，冊裡的習題逐條認真寫過，了後，我對漢字台語的發音，「文白異讀」，總算才較有整體的概念佮掌握。
當然，台語的學問是萬底深坑，閣研究落去，就會踏入考證台語本字的學術專業。建議一般使用者毋免鑽傷深，重點著加寫一寡台語文，有疑難的所在，寫羅馬字無要緊。
《廈門音新字典》所收的讀冊音（文言音）是廈門腔，差不多符合台南漢文先生讀古詩文的呼音，親像講「四書 Sù-su」。但是台灣另外有漳腔（親像講「四書 Sù-si」）佮泉腔（親像講「四書 Sìr-sir」）的讀冊音傳統。欲知影漳腔的讀冊音，就愛去買紙本的《彙音寶鑑》，是嘉義梅山沈富進先生所編的。欲知影泉腔的讀冊音，彼就足麻煩，以前有咧流傳《彙音妙悟》，但是一--來無啥有tè買，二--來，伊編排方式維持兩百年前的舊樣，足僫查，這是傳承台語嚴重的遺憾。
《廈門音新字典》所收的白話音嘛是廈門腔，彼種白話音就佮現時的台南腔差較遠，但是佮台北腔差不多。若是《彙音寶鑑》所收的文言音是嘉義梅山的偏漳腔，彼種文言音，佇嘉義通行，也佇台中彰化的山線、南投、宜蘭、桃園一帶真普遍（例字像「書 si、居 ki、如 jî、常 siâng、良 liâng、強 kiâng」）。若是白話音的部份，就相當接近現時台灣的優勢腔。腔口个問題不止複雜，先簡單講到遮。
5. 廈英大辭典、補篇；英廈辭典 網路版：1873 年初版的《廈英大辭典》，是英國過福建傳教的杜嘉德牧師(Rev. Carstairs Douglas)所編輯，原名 Chinese-English Dictionary of the Vernacular or Spoken Language of Amoy, with the Principal Variations of the Chang-chew and Chin-chew Dialects，以廈門話為主，兼收漳州佮泉州腔。1923 年，台灣府城的巴克禮牧師(Rev. Thomas Barclay) 有出「補篇」。
另外《英廈辭典》是倫敦宣道會 麥嘉湖牧師(Rev. John Macgowan)編輯，1883年出版。
遮的十九世紀所出版的福建話辭典，通予咱稽考台語佮閩南語共通的成分。親像講，有寡先進掠準台語講「一塊[tè]歌曲」是因為日本時代出現曲盤，早期一塊曲盤一條歌，所以才用 tè 來做歌曲的量詞。咱去掀 1873 年廈英大辭典，就知影當時就有這種講法，但是當年猶未發明曲盤，可見先進這種講法無影無跡[tsiah]。歌曲算 tè，是福建古早就有，佮西洋科技無底代[tī-tāi]。
一寡經典性的閩台語、客語字辭典的介紹，請參考中研究閩客語典藏的辭典簡介。
四、電腦處理台語文的基本軟體，請參考我另外一篇〈台語文羅馬字、漢字字型佮台語輸入法軟體〉。
備註：我個人平時所寫的台文，親像本站別篇台文，並無完全遵照教育部推薦用字。但是我佮教育部無仝的用字，每一字我攏有用心講究過。前提是愛全盤考慮台語音義系統性，佮維持台語漢字使用一致性，按呢，咱的用字雖然佮教育部小可仔出入，其實對官方用字也有良性的刺激效果，會當加速伊檢討修訂的跤步。
Comments powered by Disqus.