安平追想曲

鳳飛飛小姐遺音「安平追想曲」，伊个歌聲，無通[thang]嫌，咱一方面欣賞、數[siàu]念伊；毋過，一方面也著注意怹台語咬音有時會走爭。

第一句「身穿花紅長洋裝」尾字應該是 tsong，毋是伊唱个 tsang；第二句「風吹金髮思情郎」，尾字是 lông，毋是伊唱个 lâng；第三句「想郎船何往」，「郎」嘛愛唸 lông，毋是伊唱个 lâng。

「安平追想曲」是台南 許石先生作曲，才請陳達儒先生作詞，1951年个作品。作詞者佇第一段應該是全部押 ong 韻。若照鳳小姐个唱法，變做前兩句押 ang，後八句押 ong，真無理想。

閣有，第五句「伊是行船誅風浪」，用字若根據《台灣歌謠鄉土情》（莊永明、孫德銘合編），是寫做「誅 tu」，這是借音字，「行船誅風浪 kiânn-tsûn tu hong-lōng」，意思是「逆風浪 行船」。台語口語講 tu-hong 就是「逆風」个意思；tu-lâu 就是「逆流」个意思，tu 變調變第七聲。tu 一般性个意義是「對抗」，親像「佮伊 tu」 就是對抗、反抗伊。

但是現時真濟字幕、歌本寫做「逐風浪」（包括即段影片），佇遮「逐」字是文言字眼，干焦會使唸做 tio̍k，無 tu 个音，但是鳳飛飛、鄧麗君怹攏唱做「 tsu 風浪」，按呢毋著，現現是受華語影響！所以漢字佮唸音攏毋著，應該改轉來正確个原音 tu。

這是百合二重唱个版本。伊「tu 風浪」个 t (ㄉ) 聲母就唱了有準。

毋過，閣一个問題是旋律、聲調，若是原曲「tu 風浪」即三字个旋律是 52 3---，聽起來卡成「拄[tú]風浪」，「拄」變第一聲，就是「遇著風浪」个意思，按呢解說也可以，但是若口語是講「拄著風浪」，愛有補語「著」。但是百合个唱法 5 有閣降落去，變做「tù 風浪」，意思卡無好。台語講「tù水」是指「水滯流」。

總是，即塊歌先有曲，才有詞，欲要求曲个旋律完全合歌詞，有卡僫。所以無法度窮究[khîng-kiù]傷濟。