客家朋友請爭取客語為國語之一

歐洲先進國家，一國有幾若種國語並無希罕。目前中華民國个國語只有唯一个北京華語，客家朋友應該做个是爭取客語升做國語个地位，毋是佮台語儂相爭「台語」个名。當然，客語若成[tsiânn]做國語，台語嘛愛成做國語。

若是客家族、原住民族真正歡喜稱呼家己个語言是「台語」，咱才有需要進一步討論，欲按怎分別台語即个集合名詞內底个無仝語言。但是事實是，客家鄉親、原住民鄉親普遍無愛改號做台語，怹一心想欲守護怹傳統个名稱，所以即種假設性个問題就無意義。

另外請注意，當今个現實是，客委會一年有幾十億个經費好開，有24小時个客語專門台，製作放送優良个客語公益節目；台語儂無委員會，全然無獨立个經費，只有教育部下底小單位一寡零星錢。台語只有低成本个商業節目，水準足低 逐家嫌。客語所享受个國家資源大大超過台語。台語即个語族遭受真大个歧視，煞閣予儂講是福佬沙文主義。

若是客語、台語、原住民各族語攏升做「國家語言」个地位，欲按怎佇「國語」內底做分別？真簡單，將原來獨享「國語」地位个「華語」恢復「華語」正名（即个名社會也漸漸採用矣），其他个台語、客語、原住民各族語攏保持各語族家己本來佮意个稱呼就好啦。客語若已經是國家級个語言矣，閣咧佮台語相爭「台語」个名是欲創啥siô？ :p

蔡英文佇競選个時，也親喙向客家鄉親保證，伊欲將客家話升做國家語言，咱才看伊按怎守信用。