將台灣多數儂个母語（福建漳泉傳來台灣个話）叫做台語，本底著是約定俗成、通行足久个習慣講法。按呢講，嘛無影著有歧視原住民語、客家話个意思。親像咱用「英語」即个名嘛是按呢，英國並毋是干那「英語」即種語言，咱使用「英語」嘛是根據客觀上使用人口个比例佮約定俗成來號个，並無歧視英國其他个在地語言。
只是最近二、三十年來，因為政治社會上个鬥爭劇烈化，才有一寡少數中个少數，但是有勢力个人出來唱[tshiàng]反對，紲落來，自然著有一般儂綴咧喝[huah]。怹不准咱閣用台語个講法，但是怹嘛毋肯將家治个語言嘛納入台語个範圍，真正佇日常生活个對話內底，將怹个語言稱呼做是「台語」。怹有袂少儂个心肝內甚至根本看毋起「台」這个名，咁毋是？
無論咱按怎定義台語－－可比講，狹[hia̍p]義个台語按照約定俗成，來指台灣閩南語；廣義个台語就包含已經本土化个台灣各種語言－－怹毋是大聲反對，講咱是沙文主義；若無，就是共咱當做無存在，毋採用。怹个心目中，著是希望完全廢除「台語」這个名稱。
這著是怹的心態！除非予「台語」死，若無，按怎定義，都有儂會出來為反對來反對。咱應該愛有家治个主見、主張－－台語著是我咧寫、咧講即種話；若「台灣母語」、「台灣語言」、「台灣本土語言」即類卡有學術味，毋是民間約定俗成个語詞，著會用得做「集合名詞」來用，看是欲包含佗幾種語言，攏thìng好討論、修改。
咱無愛將台語叫做閩南語个動機佮心情，是欲建立台灣語言个主體性，閩南是閩南，台灣是台灣，老早就隨儂討米，隨儂落鼎、隨儂發展，咱干那認同台灣，無認同閩南，所以欲叫做台語，無愛叫做閩南語。
但是針對「閩」即字來講，這是福建上古原住民，用蛇類做圖騰才號个名。對怹來講，是一種民族標誌，真光榮，袂感覺受侮辱，亦袂自卑。是漢人佮怹接觸，才將「閩」污名化，予伊種種「野蠻」个涵意佮聯想。
咱袂使因為外族講著咱个名，口氣攏足䆀，煞家治認定即个名，本身就是下賤个，按呢咁毋是放捒家治民族个尊嚴，顛倒去認同異族侵略者、宰制者个價值觀？
這佮漢人來台灣，對台灣原住民个態度，以及將原住民污名化，會使得講一模一樣，咁毋是？
Comments powered by Disqus.