對台語文學賞个提說(thê-sueh)

引用Lau Senghian先生對福建友志Lim Kianhui先生講个話 :『我tsit站仔teh做文編，看著一寡台灣人寫ê小說，根本就是華語寫好，tsiah kā一寡詞改做台語詞，就講做是台語小說，我讀著是艱苦罪罫，ná讀ná凝ná kàn-kiāu，若我teh看，連有心寫母語文學ê人都tsiah-ni̍h-á無意識、無理想、無要緊、pàng外外，閩南語佇台灣是無可能有未來 --ê-lah！免偌久就通好扛去顧山--a。講kah tsia，我koh開始起慼--a，規腹肚火！！！』

（以下有青色下底虛線个語詞，老鼠仔箭頭徙起去，會出現台羅音標）

劉先生个慼心毋是頭一擺。想真，出世來做台灣儂，thái-thó袂慼心？總是，亦著想步設路來移易時勢。咱民間團體咧辦台語文學賞，並無消化預算个掛慮，甘爛毋甘賤，寧可賞項跳坎，賞金撨撥去下屆，嘛勿頒發予無上腳个作品致使即个文學賞落格。

閣再咱會凍規定愛寫全羅（刊出个時，編輯通共改做漢羅），若寫全羅無伊法--个，抽退步，用漢字會使，但是愛佮錄音來。對按呢，才有可能保領伊个文，伊家治歸篇用台語唸有路來、讀會肆是，通會過台文作品上起碼个要求。因為目今个台灣儂，對心肝底想倒出來 著攏是華台語摻濫个物件，一般儂講話是即款，文人落筆閣卡傷重，半烏白个雞母屎羶嶄然仔帶重。

此去按呢要求，一个有水準个台文賞才辦會透流 ，著獎个作品讀著才袂予儂凊汗㴙㴙流。