對台語老歌「港都夜雨」來看「寂寞」个台語音

出名个台語老歌「港都夜雨」，1951年楊三郎作曲，後來呂傳梓填詞、王雲峰改定。內底最後一句「港都夜雨寂寞暝」，唱到「寂」字个音樂旋律是吊懸音，聽起來佮「寂寞」佇台灣真通行个誤讀「siok-bo̍k」語言个聲調懸低有對應。

即首歌是先有樂曲，才填詞，作詞者本身有可能對「寂寞 tsi̍k-bo̍k」即个詞，已經縒音唸做 siok-bo̍k，才會佇旋律个懸音點，填「寂」字入去。作詞者若是唸「tsi̍k-bo̍k」个正音，因為 tsi̍k 第八聲佇變調个所在，是變低短調，就佮旋律个衝突卡大。

對即塊歌，阮臆，「寂寞 tsi̍k-bo̍k」唸做「siok-bo̍k」个現象，佇戰後初期就真普遍。

比較 1931 台日大辭典个「寂寞」有收 tsi̍k-bo̍k 佮 tsi̍p-bo̍k 兩種講法，但是猶未出現 siok-bo̍k。

最近幾年，台語文老師變濟，其中袂少儂強調愛恢復「寂寞」个正音，若佇社會上 捒[sak]會成功，通[thang]顯示講台語文鼓吹者確實佇規个台灣大社會有發揮影響力。

欲聽「寂寞」个「正音」，請連去教育部辭典「寂寞」。佇「詞目：寂寞」个正手爿有一个青色个箭頭，點落去就會有聲。請注意聽第一字「寂」--字。 第二字「寞」字各地个口音無仝，真濟所在第八聲本調唸中調，無像伊个聲音檔唸高調，這無要緊，毋是錯誤。