本文
有一位大學教授用心計較，致意母語教育，雖然蹛佇天龍國，猶原攏佮伊讀幼稚園个查某囝講台語， 閣有設一个「虎寶講台灣話」Facebook 專頁，內底收集古錐肨奶[hàng-ling]个虎寶講台語个生活影片真濟。 即種隨意錄落來个影片對社會个教育意義，凡勢仔閣比台仔頂正式个母語比賽錄影較大。
（2023-10-19補註：虎寶較大漢了後，𪜶老母就將迄个專頁關起來矣。）
其中有一段「同學講我是〔男生〕！」，因為伊頭毛較短，煞「逐个攏講我是〔男生〕，干焦〔小baby〕無講！」
即段影片到今有 512 个儂轉貼分享，差不多所有个留言攏是呵咾伊足古錐、媽媽足𠢕教。罕得有儂徛佇囡仔个心情來講話。
咱人類个社會，三歲囡仔就會計較男女个分別，查埔愛成查埔，查某愛成查某，袂使不男不女，長成了後，男女著匹配，同性袂使有性關係。形成一大套嚴密个人倫系統，其中有生物基礎，也有社會制度个因素，絞絞做一伙。
查某若成查埔，抑是查埔若成查某，就會予儂供體譬相[king-thé phì-siùnn]、蹧躂創治，大漢个時，若查埔去愛著查埔，有所在个法律甚至會判伊死刑。
因為性別起問題，無受同伴、社會接受，雖罔當事人只是一个囡仔嬰，伊个心理壓力有偌大，恁咁知？
我讀幼稚園个時，有一擺媽媽去街裡，相著一雙足好看个囡仔涼鞋，就歡歡喜喜買轉來予我穿。我穿去學校，下課个時，兩三个女同學看著，煞圍過來笑我查埔煞穿查某鞋。佇迄个保守个年代，庄跤个幼稚園，怹看會著个，有影干焦查某囡仔才穿涼鞋，查埔囡仔是穿規个包起來迄種。
我坐佇樹仔跤，頭犁犁，無話應怹。
隔轉工，媽媽猶原欲閣共我穿迄雙涼鞋，我就硬死毋，伊一直問我是按怎？我根本毋敢將昨昏佇學校个情形講予伊聽，干干仔毋予伊穿。伊只好閣予我穿舊鞋去學校。迄雙只穿過一工个新涼鞋，扑算就永遠收囥佇鞋櫥仔內矣。
無知个囡仔，會互相恥笑，是四常代，活甲即个歲个我，當然袂閣抾怨當年个女同學，但是到甲今仔日，我想起即層代，嘛是足艱苦心。我辜負著老母个疼痛，無勇氣抵抗社會壓力，也無勇氣對伊提說佇外口所受个委屈。
（未完）
面冊網誌留言
潘科元
影片佇遮：
https://www.facebook.com/photo.php?v=177081095830436
（2023-10-19補記：連結已經失效。）
Tiunn Siok-tsing
…….. 老師,汝切段切佇這,實在予人驚!!!!!!
潘科元
無驚，無驚，已經將最後迄句話 畫線 tsō-sak 矣 😛
黃大筆
像潘老師這種台文人才天公伯愛乎伊食<不知如何拼音>老老老
Hak-khiam Tiun
借分享。
陳恩德
以早捌看過一个bloger嘛是寫真濟教囡仔嬰台語的記事，拄仔揣著伊的網站矣，佇遮→http://goo.gl/AYMBNc
【幼稚園】你在學校到底是說「台語」還是「國語」？（獲中時嚴選好文）
BLOG.XUITE.NET
（2023-10-19補記：連結已經失效。）
陳恩德
應該蓋濟人捌看過啦呼？伊的blog蓋成足出名的款。
Comments powered by Disqus.